تیمی پارێزه‌رانی سزادراوانی بادینان: بەندکراوانمان ئازار دەدرێن

تیمی پارێزه‌رانی سزادراوانی بادینان لە ڕاگەیەندراوێکدا کە ئاڕاستەی سێ سەرۆکایەتییەکەی هەرێم و فراکسیۆنەکانی پەرلەمانی کردووە دەڵێت، “ئەوان زانیارییان هەیە کە سزادراوانی بادینان (ڕۆژنامەنووس و چالاکوانان) زۆر ئەزیەت دەدرێن و فشاری زۆیان بۆ دەهێنرێت.”
لە ڕاگەیەندراوەکەدا هاتووە، “داواتان لێدەکەین بە پیر بانگەوازەکەمانەوە بێن کە بارودۆخی تەندروستی و شوێنی حەوانەوە و مامەڵەی کارمەندانی ئیدارەی زیندانی ئاسایشی گشتیی هەولێر لەگەڵ سزادراوانی بادینان لەوپەڕی خراپیدایە و دوورە لە هەموو بەها ئینسانییەکان و هیچ ڕەچاوی مافەکانی زیندانییانیان لەگەڵ ناکرێت، داواکارین بە زووترین کات بگوازرێنەوە بۆ چاکسازیی گەورانی هەولێر، یاخود چاکسازیی زەڕکا لە دهۆک کە بەپێی یاسا دوای سزادانی هەر ڕاگیراوێک، دەبێت بگوازرێنەوە چاکسازی و وەک زیندانییانی تر مامەڵەیان لەگەڵدا بکرێت.”
ڕاگەیەندراوی تیمی پارێزەران ئاماژەی بەوەشکردووە “بەندکراوان مرۆڤن و رۆڵەی ئەم نیشتیمانەن و هیچ بیانوویەک نییە بۆ هێشتنەوەیان لە زیندانیی ئاسایش و نایاساییشە مانەوەیان لە ئاسایش و پێویستە بە زووترین کات سزادراوان ڕادەستی وەزارەتی کار و کاروباری کۆمەڵایەتی بکرێن.”