خەونی سەرۆكایەتی، شاجوانی پێشووی نیكاراگوای خستە زیندانەوە.
بڕیارە لە مانگی نۆڤەمبەری ئەمساڵدا، هەڵبژاردنی سەرۆكایەتیی نیكاراگوا ئەنجام بدرێت و بێرینیس كویزادا، شاجوانی پێشووی ئەو وڵاتە خۆی بۆ پۆستی جێگری سەرۆكی وڵات كاندید كردووە.
لایەنەكانی ئۆپۆزسیۆن و چەند كەسایەتییەكی دەرەوەی دەسەڵات و سیاسەت، خۆیان بۆ هەڵبژاردنەكە كاندید كردووە، بەڵام حكومەتەكەی دانیال ئۆرتیگا بەوە قایل نیە و دەیەوێت ناوبراو بۆ خوولی چوارەم ببێتەوە بە سەرۆك، بۆیە هەڵمەتێكی دەستگیركردنی ئەو كەسانەی بەرپاكردووە كە ویستی بەشداریكردنیان لە هەڵبژاردن و كۆكردنەوەی دەنگەكان هەیە.
بەگوێرەی سەرچاوەكان، یەكێك لەوانەی هێزەكانی حكومەت دەستگیریانكردوون، بێرینیس كویزادا، شاجوانی پێشووی نیكاراگوا و كاندیدی پۆستی جێگری سەرۆكی وڵاتە.
كویزادا لەناو ماڵەكەیدا دەستبەسەركراوە و مۆبایل و هۆیەكانی پەیوەندیكردنی لێوەرگیراوە. پارتی “هاوپەیمانیی هاونیشتمانییان” تویتێكی لەو بارەیەوە كردووە و ڕایگەیاندووە، “دەسەڵاتداران كۆت و بەندیان بەسەر ‘بێرینیس كویزادا’دا سەپاندووە و ڕێگەی پێنادەن بەشداریی هەڵبژاردن بكات و ناچار بە كشانەوە كراوە”.
