وەزیری دارایی هەرێم ڕایدەگەیەنێت، بەھەماھەنگی لەگەڵ دەزگای ئاسایشی ھەرێم دەتوانرێت ڕێگری لەو کەسانە بکرێت کە خۆیان لە باج و گومرگ دەدزنەوە.
ئاوات شێخ جەناب، وەزیری دارایی و ئابوریی هەرێم ڕایگەیاند، بەھەماھەنگی لەگەڵ دەزگای ئاسایشی ھەرێم دەتوانرێت ڕێگری لەو کەسانە بکرێت کە خۆیان لە باج و گومرگ دەدزنەوە، بەم کارەش بە ئاسانی داھاتی سنووری پارێزگای سلێمانی بەڕێژەیەکی بەرچاو بەرزدەبێتەوە.
ئەو وتانەی وەزیری دارایی ئەمڕۆ لەمیانەی سەردانكردنیدا بۆ دەزگای ئاسایشی ھەرێم و كۆبوونەوەی بوو لەگەڵ خەسرەو گوڵ محەمەد، سەرۆکی دەزگای ئاسایشی ھەرێم و تیایدا پرسی نەھێشتنی کاری نایاسایی و خۆدزینەوە لە باج و گومرگ تاوتوێكرا، وەك ئەوەی لە ڕاگەیەنراوێكی كۆبوونەوەكەدا هاتووە.
لای خۆیەوە خەسرەو گوڵ محەمەد ئامادەیی خۆی پیشاندا بەوەی ئاسایش بۆ پاراستنی گیانی ھاوڵاتییان و ئابوری و داھاتی ئەم وڵاتەیە، بۆیە دەبین بە پاڵپشتییەکی گەورە بۆ وەزارەتی دارایی.
لە کۆتاییشدا ھەریەک لە یاسین عەبدولواحید، بەڕێوەبەری گشتیی دیوانی وەزارەتی دارایی و کەمال تەیب، بەڕێوەبەری گشتی باج و خانوبەرەی میری، بۆچوونی خۆیان لەسەر میكانیزمی ڕێگریکردن لە خۆدزینەوە لە باج و گومرگ پێشکەش بە سەرۆکی دەزگای ئاسایشی ھەرێم کرد.
