هاوسەرۆكی یەكێتیی نیشتمانیی كوردستان ڕایدەگەیەنێت، ڕێگری لەھەر ھەوڵێك دەکەین، كە ئامانج لێی تێكدانی سەقامگیری و چەواشەكردنی خەڵكی خۆشەویستی کوردستان بێت، دەشڵێت ھەموو ئەو ھەنگاوانەی نراون لەپێناو بەرژەوەندی گشتیدا بووە و لە هەوڵەکانیشمان بەردەوام دەبین لە پێناو پاراستنی ئارامیی ئەم دەڤەرە.
بافڵ تاڵەبانی، هاوسەرۆکی یەکێتیی نیشتمانیی کوردستان ئەمڕۆ سێشەممە لە دەباشان پێشوازی لە سەرۆك و خزمانی عەشرەتی میراودەلی کرد.
لەكۆبوونەوەیەكدا کە قوباد تاڵەبانی ئامادەیبوو، بافڵ تاڵەبانی باسی لە دوایین پێشهات و گۆڕانكارییەكان كرد و دڵنیای كردنەوە كە ھەموو ئەو ھەنگاوانەی نراون لەپێناو بەرژەوەندی گشتیدا بووە و لە هەوڵەکانیشمان بەردەوام دەبین لە پێناو پاراستنی ئارامیی ئەم دەڤەرە. رێگریش لەھەر ھەوڵێك دەکەین كە ئامانج لێی تێكدانی سەقامگیری و چەواشەكردنی خەڵكی خۆشەویستی کوردستان بێت.
بەگوێرەی ڕاگەیەندراوی كۆبوونەوەكەش، “ھاوسەرۆكی یەكێتی ئەوەشی بۆ خزمانی عەشرەتی میراودەلی ڕوونكردەوە كە یەكێتی دەبێتەوە بە یەكێتییە بەھێزەكەی جاران و لە ئاست خواست و چاوەڕوانی یەكێتییەكان و كۆمەڵانی خەڵكی كوردستان بەگشتی دەبێت و لەداھاتوودا دەرئەنجامی باش دەبینن”.
لە درێژەی کۆبوونەوەکەدا بافڵ تاڵەبانی ستایشی ڕۆڵی گرنگ و مێژوویی عەشیرەتی میراودەلی کرد و ڕایگەیاند، ئێوە عەشرەتێكی تێكۆشەر و خاوەن ھەڵوێستی جوامێرانەن، ھەمیشە پاڵپشتی یەكێتییەكەی مام بوون و ئێستاش ھەر ئەوەتان لێ چاوەڕوان دەكرێت.
