تەیموری ئەنفال، کە یەکێکە لە تاقانەکانی ئەنفال ڕایگەیاند، دوای ئەوەی هەستیکردووە ژەهرخواردکراوە، پشکنینی بۆكراوە و ئەنجامی پشکنینەکەی پۆزەتیڤە.
تەیموری ئەنفال، لەبارەی ژەهرخواردنەکەیەوە دەڵێت، “بەداخەوە بە ئامانجکراوین و سەردانی دکتۆرم کردووە و پشکنینی ژەهریان بۆ ئەنجامداوم، دەرکەوت پشکنینەکەم پۆزەتیڤە و ژەهرخواردکراوم، بەو هۆیەشەوە زۆربەی ددانەکانم شکاون تا ئێستاش کاریگەریی ئەو ژەهرە بەجەستمەوە دیارە و دۆخی تەندروستیم باش نییە”.
ئەو تاقانەیەی ئەنفال لەبارەی تێكچوونی تەندروستییەوە ڕایگەیاند، “ڕۆژ لەدوای ڕۆژ دۆخی تەندروستیم خراپتر دەبێت، زۆربەی جاریش کە شتێک دەخۆم لەگەڵیدا لەتێک لە ددانەکانم دەشکێت و کاریگەریی خراپی بەسەر مێشک و سەرمدا هێناوە، هەندێکجار کە بەڕێگادا دەڕۆم، تووشی سەرەسووڕە دەبم و دەکەوم، هەر لەبەر ئەو هۆکارانەش بووە سەردانی دکتۆرم کردووە”.
