بافڵ تاڵەبانی، ھاوسەرۆکی یەکێتیی نیشتمانیی کوردستان لە دەباشان لەگەڵ لێپرسراوی سەرجەم مەڵبەندەکانی یەکێتی کۆبووەوە و ڕاشیسپاردن کادران و ئەندامانی یەکێتی لەم ھەنگاوانەی چاکسازی لە حیزب و حکومەت ئاگاداربکەنەوە و ئەو چاکسازییە بکەنە بەڵگەی دەستەگوڵی یەکێتی بۆ ھاوڵاتییان و دەستمایەی سەرکەوتنی لیستی ھاوپەیمانی کوردستان لەم ھەڵبژاردنەدا.
لەکۆبوونەوەکەدا بافڵ تاڵەبانی ڕۆشنایی خستەسەر دوایین پەرەسەندنە سیاسییەکان لە ھەرێم و عێراق، ھەڵوێست و ستراتیژی یەکێتی بۆ کۆی ھاوکێشەکان ڕوونکردەوە و جەختی لە سیاسەتی نیشتمانی و ھاوسەنگی یەکێتی کردەوە بۆ پرسەکان و پاراستنی یەکڕیزی نێو ماڵی کوردی بە گرنگ وەسفکرد.
لەبارەی بەرپرسیارێتی ڕێکخراوەیی و حزبی و ڕۆڵی کادران و ئەندامانی یەکێتی، بافڵ تاڵەبانی بەرچاوڕوونیدایە ئامادەبووان و ئەرکی ئەمڕۆی ڕوونکردەوە و ڕایگەیاند، مەڵبەندەکان و کادرانی ڕێکخستن شادەماری یەکێتین و ماندووبوونیان جێگای ستایش و پێزانینە.
پێویستە وەک ھەمیشەش کادر و ئەندامانی یەکێتی خزمەتکاری خەڵک بن و مەڵبەند و ئۆرگانەکانیش ببنەوە بە ماڵی ڕاستەقینەی حیزبایەتی و تێکۆشانی سیاسی و ڕێکخراوەیی، بەبێ جیاوازی پردی پەیوەندی گەیاندنی دەنگی کۆمەڵانی خەڵک بن بە یەکێتی و حکومەت.
بافڵ تاڵەبانی بە لێپرسراوی مەڵبەندەکانیشی وت چاوەڕوانیمان لێتان ئەوەیە حیزب و ژیانی سیاسی مەدەنی تەندروست بکرێتەوە و بە ڕێگای ڕاستەقینەی یەکێتی نوێدا بڕوات.
ڕاشیسپاردن کادران و ئەندامانی ھۆشیاری یەکێتی لەم ھەنگاوانەی چاکسازی لە حیزب و حکومەت ئاگاداربکەنەوە و ئەو چاکسازییە بکەنە بەڵگەی دەستەگوڵی یەکێتی بۆ ھاوڵاتییان و دەستمایەی سەرکەوتنی لیستی ھاوپەیمانی کوردستان لەم ھەڵبژاردنەدا.
