مستەفا كازمی، سەرۆكوەزیرانی عێراق، ئەمڕۆ دووشەممە 19ی تشرینی یەكەم لە كۆشكی ئیلیزێ لە پاریس، لەگەڵ ئیمانوێل ماكرۆن سەرۆككۆماری فەڕەنسا دا كۆبووەوە.
نووسینگەی سەرۆكوەزیرانی عێراق ڕاگەیاندراوێكی بڵاوكردەوە و ئاشكرایكرد، “لە درێژەی گەشتەكەیدا بۆ ئەوروپا كە سەردانی فەڕەنسا و ئەڵمانیا و بەریتانیا دەكات، ئەمڕۆ دووشەممە 19ی تشرینی یەكەم، مستەفا كازمی، سەرۆكوەزیران لە كۆشكی ئیلیزێ لەگەڵ ئیمانوێ ماكرۆن سەرۆككۆماری فەرەنسا دا كۆبووەتەوە.”
بە گوێرەی ڕاگەیاندراوەكە، “كازمی لەگەڵ ماكرۆن دا پەیوەندیی نێوان عێراق و فەڕەنسا و چۆنێتیی پەرەپێدانیانی تاووتوێكردووە، بە تایبەت لە بوارەكانی ئابوری و ئاسایش و كەلتور و ڕوبەڕوبوونەوەی تیرۆردا.”
سەرۆكوەزیرانی عێراق، “سوپاسی هەوڵەكانی فەڕەنسا-ی كردووە بۆ ڕاگەیاندنی دەستپێشخەریی پشتیوانیكردنی حكومەتی عێراق، لە جێبەجێكردنی هەندێك لە بڕگەكانی كارنامە چاكسازییەكەی حكومەتدا.”
