دژەتیرۆر لە ڕوونکردنەوەیەکدا بۆ ڕایگشتی ئاشکرایدەکات، هەندێک کەس بەبێ ویستی ئەوان ناوی ئەو دەزگایەیان بەکارهێناوە بۆ کاری نائاسایی و لە دەرەوەی ئەو دەزگایەوە بوون، هاوکات هەندێک کەس تێوەگلاون لە کارەکانیان دەرکراون و ڕوبەڕوی یاسا دەکرێنەوە.
لە ڕوونکردنەوەکەی دژەتیرۆردا هاتووە، ” ئێمە لێرەدا بۆ کۆمەڵانی خەڵکی کوردستانی ڕوون دەکەینەوە ، ھێزی دژەتیرۆر دوورو نزیک پەیوەندی بەھیچ کارێکی نایاسایی و قاچاخچێتی و سەرانەوەرگرتن و داگیرکردنی زەوی و موڵکی گشتی یەوە نیەو نەبووە ، بەڵکو ڕاستیەکە ئەوەیە ھەندێ کەسی نابەرپرس لەدەرەوەی ویستی ئێمەو بەخواستی چەند کەسێکی یاساشکێن و دوور لە دەسەڵاتی ئێمە ناو ناوبانگی ئەم دەزگایەی بەکارھێناوە بۆ کاری نایاسایی و دەستدرێژکردن بۆ سەر بەرژەوەندی گشتی، کە بەڕەسمی سەر بە بەڕێوەبەرایەتی دژەتیرۆر نەبوون ، چەند کەسێکیش کە تێوەگلابوون بەم کارە نایاساییانە بە ڕەسمیدەرکراون و رووبەڕووی دادگا دەکرێنەوە، چیتر رێگەش نادرێت کەسانێکی بەرژەوەندی خواست بۆ مەرامی تایبەتی دەست لەکاروباری دژەتیرۆرەوە وەربدات “.
لە ڕوونکردنەوەکەی دژەتیرۆردا ئاماژە بەوەشکراوە، ” بۆ ھەموولایەکی ڕووندەکەینەوە دژەتیرۆر وەک ھەمیشە، لە سەنگەری خەڵک ، سەروەری یاسا ، ئارامی و ئاسایش و پاراستنی سەروماڵی خەڵک و شکۆی ھەرێمی کوردستان دەبێت ، ئەرکی سەرەکیمان ڕوبەڕوبوونەوەی ھەر پیلانێکە کە بیەوێت ئارامی لە خەڵک تێکبدات ئاشکراشیدەکەین ھێزی دژەتیرۆر ھێزی خەڵک و ھەموو رەنگ و بۆچوونە جیاوازەکانە و بەگڕوتینێکی نوێ و بە بەھێزترەوە لە ڕابردوو ، پشتیوان بەخوای گەورەو بە ھاوکاری ھەمووان و ھێزی پێشمەرگەو ھێزەکانی ئاسایش و ناوخۆ لە ئەرکداین بۆ پاراستنی کوردستانەکەمان و سەقامگیری زیاتری ئاسایش و ڕووبەڕووبوونەوەی یاساشکێنان و ھەڵھاتوان لە یاسا “.
