وه‌زاره‌تی په‌روه‌رده‌ی هه‌رێم ژماره‌یه‌ك بڕیاری لەبارەی تاقیكردنەوەی نیشتیمانی پۆلی 12ی ئامادەیی دەركرد.
لە نوسراوێكدا، وه‌زاره‌تی په‌روه‌رده كە ئاڕاستەی بەڕێوەبەرایەتییەكانی كردووە تیایدا ئاماژەی بەوەكردووه، “به‌مه‌به‌ستی دابینكردنی كه‌شێكی ته‌ندروست و ئارام و باش بۆ به‌ڕێوه‌چوونی پرۆسه‌ی تاقیكردنه‌وه گشتییه‌كانی قۆناغی 12ی ئاماده‌یی به‌هه‌موو به‌شه‌كانیه‌وه بڕیاردرا، له‌هه‌موو ئاسته‌كانی به‌رپرسیارێتیی ناو وه‌زاره‌تی په‌روه‌رده، سه‌ردان و بەسه‌ركردنه‌وه‌ی ناو هۆڵی تاقیكردنه‌وه گشتییه‌كان ڕێگه‌پێدراو نیه”.
لە خاڵێكی دیكەی بڕیارەكان هاتووە، “سه‌رپه‌رشتیاران ده‌توانن سه‌ردانی ناو هۆڵی تاقیكردنه‌وه‌كان بكه‌ن، به‌ڵام به‌هیچ جۆرێك سه‌رپه‌رشتیاران و به‌ڕێوه‌به‌ری هۆڵ و یاریده‌ده‌ر و مامۆستایانی چاودێر، ڕێگایان پێنادرێت مۆبایل ببه‌نه ناو هۆڵه‌كانی تاقیكردنه‌وه‌كان، ده‌توانن مۆبایله‌كانیان له ئیداره‌ی ناوه‌ندی تاقیكردنه‌وه‌كان دابنێن”.
هەروەها، “ڕێگه نادرێت میدیاكان هیچ جۆره ڕووماڵێكی میدیایی له‌ناو هۆڵی تاقیكردنه‌وه گشتیه‌كان ئه‌نجامبده‌ن، ته‌نها ده‌توانن لێدوانی میدیایی له به‌ڕێوه‌به‌ری ناوه‌ندی تاقیكردنه‌وه‌كان وەربگرن له ده‌ره‌وه‌ی هۆڵی تاقیكردنه‌وه‌كان”.
بڕیارە 25ی ئەم مانگە تاقیكردنەوەی نیشتیمانی پۆلی 12 ئامادەیی لە هەرێمی كوردستان ئەنجام بدرێت.
