ئەمڕۆ چوار دەستگیركراوی دیكەی بادینان دادگایی دەكرێن

بڕیارە ئەمڕۆ چوار چالاكوانی دیكەی بادینان دادگایی بكرێن، کەسوکاریان داوا لە پەرلەمانتاران و خەڵك دەكەن لە دادگا ئامادە بن و چاودێریی پرۆسەكە بكەن.

ئەمڕۆ لە دادگای دووی تاوانەكانی هەولێر دادگاییكردنی چوار دەستگیركراوی دیكەی بادینان بەڕێوەدەچێت، كە بریتین لە، (مەسعود شەنگالی، بەندەوار ئەیوب ڕەشید، کارگەر عەباس عەلی، شێروان تەها ئەمین).

هەروەها ڕۆژی پێنجی ئەم مانگە بڕیاربوو پرۆسەی دادگاییكردنی پێنج چالاكوان بەڕێوەبچێت، كە بریتی بوون لە، (عامر خالید عەگید، فرسەت ئەحمەد سەعید، جەمال خەلیل مەجید، سلێمان كەمال سلێمان و سلێمان موسا ئەحمەد)، بەڵام بەهۆی ئەوەی دادوەری سەرەكی ئامادەنەبوو، دادوەری جێگرەوە داوایكردبوو دادگاییەكە دوابخرێت، بڕیارە سبەینێ پرۆسەی دادگاییكردنی ئەو پێنج دەستگیركراوەی دیكەش بەڕێوەدەچێت.

لە بانگەوازێكیشدا كەسوكاری دەستگیركراوان ئاشكرایانكرد، تۆمەتی دادگاییكردنەكە بریتییە لە، “تێکدانی ئاسایشی گشتی و سیخوڕیکردن بۆ ئەمریكا، بەریتانیا، مستەفا کازمی و بەرهەم ساڵح”، داواشیان لە گشت فراکسیۆنەکانی پەرلەمان، ڕێکخراوەکانی مافی مرۆڤ، پارێزەران، چالاکوانان و خەڵکی مەدەنی كرد، لە دادگای دووی تاوانەکانی هەولێر ئامادەبن و بەرگریی لە چالاکوانان بکەن.

بڕیاریشە لە ڕۆژی 29ی ئەم مانگە دانیشتنێکی دادگا بۆ دادگایکردنی ئومێد بەرۆشكی و مامۆستا بەدەل بەرواری بەڕێوەدەچێت.

بابەتی پێشتر

لە دوو ڕووداوی تەقەکردندا کچ و پیاوێک کوژران

بابەتی دواتر

پۆلیس و ئاسایش و پێشمەرگە بۆ نێوەندگیری شەڕەکەی باڵەکایەتی جوڵەیان پێکراوە

بابەتی پەیوەندیدار
Total
4
Share