وەزیری خوێندنی باڵا و توێژینەوەی زانستی، بڕیاریدا بە بەخشین لە ڕسوماتی هەر دەرچوویەکی زانکۆ و پەیمانگاکان ئەگەر ویستی ببێتە چاودێر لە هەڵبژاردنی پێشوەختی ئەنجومەنی نوێنەرانی عێراق.
بەپێی نوسراوێک کە واژووی ئارام محەمەد، وەزیری خوێندنی باڵا و توێژینەوەی زانستی لەسەرە تێیدا هاتووە، ” بڕیاردراوە بە بەخشینی ڕسوماتی داواکردنی پشتگیری بۆ دەرچوانی زانکۆ و پەیمانگاکان، بەمەبەستی پێشکەشکردن بۆ بوون بە چاودێر لە کۆمسیۆنی باڵای سەربەخۆی هەڵبژاردنەکانی عێراق”.
پێشتر کۆمسیۆنی باڵای هەڵبژاردنەکان ڕایگەیاندبوو، خوێندکارانی زانکۆ، پەیمانگە و ئەوانەش کە خوێندنیان تەواوکردوە، بەلای کەمەوە هەڵگری بڕوانامەی ئامادەیی بن و تەمەنیان لە 19 ساڵ کەمتر نەبێت و لە 56 ساڵیش زیاتر نەبێت دەتوانن فۆڕم پڕبکەنەوە، بۆ بوون بە کارمەندی دەنگدان.
بڕیارە 10ی تشرینی یەکەمی ئەمساڵ هەڵبژاردنی پێشوەختی پەرلەمانی عێراق بەڕێوەبچێت و کۆمسیۆن بەردەوامە لە ئامادەکاریەکانی.
