تەرمی كوڕ و كچێك لە سنووری ناحیەی سنونێ بە كوژراوی دۆزراوە و بەڕێوەبەری ناحیەكەش دەڵێت، پۆلیس لێكۆلینەوە لەسەر ڕووداوەكە دەستپێكردووە.
خودێدا چوکی، بەڕێوەبەری ناحیەی سنونێ بە تۆڕی میدیایی ئێستای ڕاگەیاند، دوێنی تەرمی کوڕ و کچێکی ئێزدی لە ئاقاری گوندی ئادیکا كە دەكەوێتە ڕۆژهەڵاتی گەلی کەلسێ-ی سەر بەقەزای شەنگال بە کوژراوی دۆزرانەوە.
وتیشی، “وەکو نەریتێک لەناو ئێمەی ئێزدییەکان، بۆ خوازبینی لەلایەن کوڕەوە کچەکە دەڕفێنرێت و دواتر بەڕەسمی هاوسەرگیری دەکەن، ئەم کوڕەش مەبەستی ئەوەبووە، بەڵام لەلایەن هەندێک کەسی نەناسراوەوە بە گولـلە کوژراون”.
کورەکە ناوی (درید خالد) تەمەن 31 ساڵە و کچەکەش (ساندرا خەلیل) تەمەن 21 ساڵە و هەردووکیان نیشتەجێی ناحیەی سنونێ-ن سەر بەقەزای شەنگال.
بەڕێوەبەری ناحیەكە وتی، پۆلیسی شەنگال لێكۆلینەوەی لەسەر ڕووداوەكە دەستپێكردووە و ئەوەشی خستەڕوو، دوای پشکنینی لاشەی هەردوو قوربانییەكە لە پزیشکی دادی موسڵ، ئەمڕۆ تەرمەكانیان وەرگیرایەوە و لەلایەن كەسوكارەكانیانەوە بەخاكسپێردران.
