هاوپەیمانیی نێودەوڵەتی بڵاویكردەوە، ئەمریكا وەڵامی هێرشەكەی شەوی ڕابردووی سەر هێزەكانی لە دێرەزور داوەتەوە.
واین مارتۆ، وتەبێژی هاوپەیمانیی نێودەوڵەتی لەڕێگەی ئیمەیڵەوە بە تۆڕی میدیایی ئێستای ڕاگەیاند، شەوی ڕابردوو هێزەكانی ئەمریكا دوای هێرشكردنە سەر هێزەكانیان لە نزیك کێڵگەیەکی نەوتیدا لە ناوچەی ڕیفی دێرەزور، بە بۆردومانكردن وەڵامی هێرشەكەیان داوەتەوە.
وتەبێژەكەی هاوپەیمانیی نێودەوڵەتی ئاماژەی بەوەشكردووە، ئەمریكا وەكو وەڵامدانەوەیەك و بۆ بەرگریكردن لەخۆی، موشەكبارانی ئەو شوێنەی كردووە، كە هێزەكانی ئەمریكای لێوە كراوەتە ئامانج.
وتەبێژی هاوپەیمانیی نێودەوڵەتی باسی زیانەكانی هێرشەكەی سەر بنكە سەربازییەكە و وەڵامەكەی ئەمریكای نەكردووە، بەڵام شەوی ڕابردوو ڕوانگەی سوری بۆ مافەكانی مرۆڤ بڵاویكردەوە، “لەلایەن میلیشیاكانی نزیك لە ئێرانەوە چەند گوللـە تۆپێك ئاراستەی کێڵگەی نەوتی عومەر كراوە لە ناوچەی ڕیفی دێرەزور، کە هێزەکانی ئەمریکا کردوویانەتە بنەکەی سەربازیی خۆیان”.
ڕوانگەی سوری باسیلەوەشكردبوو، “چەند ئوتۆمبێلێک لەو بنکەیە سوتاون، كە سوپای ئەمریکای تێدایە”.
ڕوانگەی سوری بۆ مافەكانی مرۆڤ ئاشكراشیكردووە، “میلیشیاکانی نزیک لە ئێران لە ناوچەکانی ڕۆژئاوای ڕووباری فوراتەوە ئەو بنکەیەی سوپای ئەمریکایان کردووەتە ئامانج”.
