سەرچاوەیەکی ئیسرائیلی باسی لە ناوچەی جۆلان دەکات و دەڵێت، تائێستا جۆلان لە گفتوگۆکانیان لەگەڵ ئەمریکا باسنەکراوە، بەڵام بەهەموو شێوەیەک جۆلان تاهەتایە لەژێر کۆنترۆڵی ئیسرائیلدا دەبێت.
کەناڵی 20ی عیبری لە ڕاپۆرتێکدا لەزاری سەرچاوەیەکی سیاسیی ئیسرائیلییەوە بڵاویکردەوە، لە هیچ گفتوگۆیەک لەگەڵ ئەمریکییەکان پرسی جۆلان باسنەکراوە، جەختیکردەوە جۆلان بەشێکە لە خاکی ئیسرائیل و تاهەتایەش لەژێر کۆنترۆڵی ئیسرائیلدا دەبێت.
ئەمە هاوکاتە لەگەڵ بڵاوبوونەوەی ڕاپۆرتێک سەبارەت بە پاشگەزبوونەوەی ئەمریکا لە دانپێدانانی وڵاتەکەی بۆ سەروەریی ئیسرائیل لە ناوچەی جۆلانی سوریا و سەرچاوەیەکی وەزارەتی دەرەوەی ئەمریکا بە پێگەی واشنتۆن فری ڕاگەیاندووە، ئیدارەی جۆبایدن لە دانپیدانانی سەروەریی ئیسرائیل لە ناوچەی جۆلان پاشگەزبووەتەوە.
ئەو پێگەیە لەزاری سەرچاوە ئەمریکییەکەوە باسی لەوەکردووە ئیدارەی سەرۆک بایدن پێیوایە، ناوچەی هیچ لایەنێک نییە بەتەنیا، کۆنترۆڵکردنیشی بەپێی جیاوازدەبێت بەپێی ئەو گۆرانکارییانەی لەناوجەکەدا ڕوودەدەن.
