هاوسەرۆكانی یەكێتی لەگەڵ سەرۆكی هاوپەیمانی عەزم كۆبوونەوە و ڕایدەگەیەنن، دوای ھەڵبژاردنەکان دەرفەت گونجاوە تاوەکو ھاوپەیمانی کوردستان لەگەڵ ھێزە کوردستانی و عێراقییەکان لەبەرەیەکی فراوانی نیشتمانی کۆببینەوە.
بافڵ تاڵەبانی و لاهور شێخ جەنگی، ھاوسەرۆکانی یەکێتیی نیشتمانیی کوردستان ئەمڕۆ لە دەباشان پێشوازیانکرد لە خەمیس خەنجەر، سەرۆکی ھاوپەیمانی عەزم و سەرکردەی دیاری سوننەکان.
ھاوسەرۆکانی یەکێتی بە لەبەرچاوگرتن و خوێندنەوە بۆ واقیعی سیاسی عێراق، ھەرێم و ناوچەکە و کێشمەکێش و ململانێ نێودەوڵەتییەکان، نەخشەڕێگای یەکێتییان بۆ دۆخی ئەمڕۆی عێراق خستەڕوو و تەئکیدیان لە چارەسەرکردنی سیاسییانەی کێشەکان و زاڵبوون بەسەر بەربەستەکان کردەوە، وەك ئەوەی لە ڕاگەیەنراوێكی كۆبوونەوەكەدا هاتووە.
ئاماژەشدەدات، هاوسەرۆكانی یەكێتی ڕوونیانکردەوە دیالۆگی بونیادنەرانەی نیشتمانی لەنێوان ھێزە کوردی و عێراقییەکان بەپێویستی ئەم قۆناغە دەزانین و بە پرۆژە و دیدی ھاوبەش و پاراستنی بەرژەوەندییە گشتییەکان دەتوانین وڵاتێکی سەقامگیری دەستەبەربکەین.
“وەک یەکێتی باوەڕی تەواومان بەکارکردنی پێکەوەیی ھەیە لەگەڵ دۆستەکانمان لە بەغداد تاوەکو خاڵە ھاوبەشەکانمان بپارێزین و گیانی پێکەوەژیان و یەکتریقبوڵکردن ببووژێنینەوە و بەھەموو شێوەیەکیش سیاسەتی مەزھەبی، نەتەوەیی، زۆرینە و کەمینە و خۆسەپێنی ڕەتدەکەینەوە و بەھۆکاری ناسەقامگیری و قوڵبوونەوەی گرفت و کێشەکانی دەزانین” هاوسەرۆكانی یەكێتی وادەڵێن.
لە بەشێكی دیكەی ڕاگەیەنراوەكەدا هاتووە، لەبارەی ھەڵبژاردنی پێشوەختەی ئەنجوومەنی نوێنەرانی عێراق و ھاوپەیمانی کوردستان لەنێوان یەکێتی و گۆڕان، ھاوسەرۆکان ھەڵوەستەیانکرد و دووپاتیانکردەوە لەگەڵ ئەنجامدانی ھەڵبژاردنێکی پاک و بێگەردن لەکاتی خۆیدا بەڕێوەبچێت و ڕێوشوێنەکانی ئەنجامدانی پرۆسەیەکی دیموکراسی وەھا فەراھەمبکرێت کەببێتە مایەی ڕەزامەندی ھەمووان و خێروخۆشی بۆ وڵات. راشیانگەیاند ھاوپەیمانی کوردستان ھەنگاوێکە بۆ یەکڕیزی نیشتمانیی کورد و ھەنگاونان بۆ یەکگوتاری و یەکخستنی توانا سیاسییەکان بۆ خزمەتکردنی خەڵک. دووپاتشیانکردەوە دوای ھەڵبژاردنەکان دەرفەت گونجاوە تاوەکو ھاوپەیمانی کوردستان لەگەڵ ھێزە کوردستانی و عێراقییەکان لەبەرەیەکی فراوانی نیشتمانی کۆببینەوە و لەسەر پاراستنی بەھاباڵاکان سیاسەتێکی نوێ دابڕێژین و پێکەوە خزمەتی گەل و وڵات بکەین.
لە دوا بەشیشیدا هاتووە، پەیوەندییەکانی ھەرێم و ناوەند و پابەندبوون بەرێکەوتنی ھەردوولا بە ناردنی شایستەداراییەکانی ھەرێم گفتوگۆی وردی لەبارەوەکرا و جەخت لەبەردەوامی گفتوگۆکان و چارەسەرکردنی کێشەکان لەسەر بنەمای دەستوور و بەرژەوەندی گشتی کرایەوە.
