وەزارەتی نەوتی عێراق بەپێی ئەو ئامارانەی کۆمپانیای بەبازاڕکردنی سۆمۆ ڕادەستیکردوون، بڕی هەناردەی نەوت و داهاتەکانی لە مانگی ئایاردا بڵاوکردەوە.
لە ڕاگەیەندراوێکدا وەزارەتی نەوتی عێراق بڵاویکردەوە، بڕی نەوتی هەناردەکراو لە مانگی ئایاردا لەکێڵگە نەوتییەکانی ناوەڕاست و باشووری عێراق 86 ملیۆن و 820 هەزار و 355 بەرمیل نەوت بووە.
هەروەها بڕی نەوتی هەناردەکراو لە کێڵگە نەوتییەکانی کەرکوک لەڕێگای بەندەری جەیهانەوە سێ ملیۆن و 60 هەزار و 913 بەرمیل بووە.
ئاماژە بەوەکراوە داهاتی نەوت لە مانگی ئایاردا، پێنج ملیار و 917 ملیۆن و 932 هەزار دۆلار بووە.
لە ئامارەکەدا هاتووە، ئەو بڕە نەوتە لەلایەن 32 کۆمپانیای وڵاتانی جیاوازەوە هەناردەکراون، تێکڕای نرخی یەک بەرمیل نەوت 65.8 دۆلار بووە لە مانگی ڕابردوودا.
