وەزارەتی پلاندانانی عێراق ڕێژەی نزمبوونەوەی نرخی بەشێک لە کاڵا و پێداویستییەکانی هاوڵاتییانی ئاشکراکرد و ڕاشیگەیاند لە مانگی ئایاردا تێکڕای هەڵاوسان بەرزبووەتەوە بەراورد بە مانگی نیسان.
عەبدولزەهرە هینداوی وتەبێژی وەزارەتی پلاندانانی عێراق ڕایگەیاند، نرخی کاڵا خۆراکییەکان لە مانگی ئایاردا دابەزینێکی کەمی بەخۆوە بینیوە و تێکڕا بەڕێژەی 0.3% نرخەکانیان دابەزیوە، هەروەها تێکڕای هەڵاوسان 0.04% بەرزبووەتەوە.
وەزارەتەکە ئاماژەی بەوەکردووە کە هەڵاوسان لە مانگی کانونی دووەمی ساڵی 2020 تا مانگی ئایاری ئەمساڵ بەڕێژەی 5.6% بەرزبووەتەوە.
وتەبێژی وەزارەتی پلاندانانی عێراق دەڵێت، لە مانگی کانونی یەکەمی ساڵی ڕابردوودا لەگەڵ بەرزبوونەوەی نرخی دۆلار ڕێژەی هەڵاوسان 3.3% بەرزبووەوە، لە مانگی کانونی دووەمی ئەمساڵدا 0.8% بەرزبووەوە، مانگی شوبات 0.7%، مانگی ئازار 0.6% و لەمانگی نیساندا ئاماژەکانی هەڵاوسان 0.1% دابەزیون.
بەپێی ئەو ڕاگەیەندراوەی وتەبێژی وەزارەتی پلاندانانی عێراق بڵاویکردووەتەوە، نرخی کاڵا خۆراکییەکان بەڕێژەی 0.3% دابەزیوە، نرخی پێداویستییەکانی ناوماڵ، کاڵاکانی نیشتەجێبوون و کەلوپەلی وەبەرهێنان 0.2% دابەزیوە.
هەروەها نرخی بوارەکانی پەیوەندیکردن 0.3% بەرزبووەتەوە، نرخی یاری و بابەتە چێژبەخشەکان 1.5% بەرزبووەتەوە و نرخی بابەتە تەندروستییەکان 0.1% بەرزبووەتەوە.
