پۆلیسی ڕاپەڕین ڕایگەیاند، ژنێک و دایکی 23 هەزار دۆلاریان داوە بە کەسێک تا پیاوەکەی بکوژێت و ئێستا هەرسێ تۆمەتبارەکە دەستگیرکراون.
لە ڕاگەیەندراوێکدا پۆلیسی ڕاپەڕین دەڵێت، ” دوای ئەوەی لە مانگی نیساندا لە ناحیەی حاجیاوا هاوڵاتی (س،خ،پ) لەدایکبووی ساڵی 1988 پیشەی کاسب دانیشتوی حاجیاوا لەنزیک ماڵەکەی خۆی درایە بەر دەستڕێژی گولـلە و بەوهۆیەوە گیانی لەدەستدا، دواتر 2 تۆمەتبار دەستگیرکران کە یەکێکیان خێزانی کوژراوەکە و ئەوەی تریان خەسوی کوژراوەکە بوو بە پێی ماددەی 406 لە یاسایی سزادانی عێراقی ڕاگیران”.
ئاماژە بەوەشکراوە ” لەدوای بەدواداچوون و کۆکردنەوەی زانیاری و سوودوەرگرتن لە کامێراکانی چاودێریکردن، لەلایەن بنکەی پۆلیسی حاجیاوا بکوژی سەرەکی ڕوداوەکە بەناوی (س،آ،آ ) دەسگیرکرا و بە هەمان مادە بەبڕیاری دادوەری لێکۆڵینەوە ڕاگیرا”.
پۆلیسی ڕاپەڕین لە ڕاگەیەندراوەکەدا دەشڵیت، ” بەڵگەی تەواو و کۆکرایەوە لە دژی تۆمەتباری سەرەکی (س،آ،آ) بەڵام لەسەرەتادا نکۆڵی دەکرد، دوای لێکۆڵینەوەی زیاتر و وردەکاری زیاتر و خستنە ڕووی بەڵگەی زیاتر، تۆمەتبار (س،آ،آ) لە ئێستا دانی ناوە بەتاوانەکەیدا”.
ئێستادا تۆمەتبار (س،آ،آ) لە بەردەم پۆلیس و دادگا دانی ناوە بەتاوانەکەیدا، بە وتەی خۆی دەڵێت لەگەڵ خێزانی کوژراو ڕێککەوتووە کە لە بەرامبەر بڕی 22700 دۆلاری ئەمریکی لە خێزانی کوژراو وەربگرێت و مێردەکەی بۆ بکوژێت.
