وڵاتی مەكسیك لێكۆڵینەوە لە كەیسی دوو ژن دەكات كە گومان دەكرێت، لەكاتی دەستگیركردنیان لەلایەن دەسەڵاتدارانی كۆچی ئەمریكاوە نەشتەرگەرییان بۆ كرابێت بەبێ ویستی خۆیان.
وەزارەتە مەكسیكییەكە ئەوەشی خستوەتەڕوو، كونسوڵخانەی وڵاتەكەی لە ئەتلانتا لە پەیوەندیدان لەگەڵ پارێزەران، بۆ ئەوەی ڕێگای یاسایی بدۆزنەوە بۆ ڕاگرتنی ئەو پێشێلكارییە مرۆییەی كراوە، ئەوەش باسكراوە، كە حكومەتی ئەو وڵاتە چاوپێكەوتنی لەگەڵ ژنێكی مەكسیكی كردووە، مانگی ئەیلول لە ناوەندێكی مانەوەی كۆچبەری سەر بە ئەمریكا “نەشتەرگەری ژنانەی بۆ كراوە” بەبێ ڕەزامەندیی خۆی “مناڵدانیان لابردووە”.
حكومەتی مەكسیك ئاشكرایكردووە، ژنێكی دیكەی مەكسیكی هەمان چیرۆكی هەبووە و بێ ڕەزامەندی خۆی هەمان نەشتەرگەری بۆ كراوە، بۆیە لێكۆڵینەوەكانیان بە چڕی لەو بابەت دەستپێكردووە.
بە گوێرەی ئەو ئامارە فەرمییانەی میدیاكانی ئەمریكا بڵاویان كردووەتەوە، ژمارەی ئەو مەكسیكییانەی لە ئەمریكا دەژین لە سەرووی 37 ملیۆن كەسەوەیە، وێرای جەختكردنەوەی ترەمپ لەسەر ئەوەی سنووری وڵاتەكەی تۆكمە بێت و ڕێگا نەدرێت بە قاچاخ مەكسیكییەكان بچنە وڵاتەكەیەوە، بەڵام ڕۆژانە سەدان مەكسیكی لە سنوورەكان دەستگیر دەكرێن.
