پشکنینی خولاوەی یاریزانانی یانەی کرۆتۆنی ئیتاڵی دەریخستووە، کە یاریزانێکی لاوی یانە ئیتاڵییەکە تووشی کۆرۆنا بووە و یاریزانان بەگشتی خراونەتە ژێر چاودێرییەوە.
پشکنینی یاریزانان بەیانی ڕۆژی شەممە ئەنجامدراوە و بڕیارە ئەمڕۆ بەر لە ڕوبەڕوبوونەوەی یانەی یوڤانتۆس ئەنجامی کۆتایی دووەم پشکنین ئاشکرابکرێت.
دێنیس دراگۆش لەدوای جێبەجێکردنی چالاکییە نێودەوڵەتییەکان بەدرێسی لاوانی ڕۆمانیاوە، لە 15ی تشرینی یەکەم گەڕاوەتەوە بۆ ئیتاڵیا و پەیوەندی بە یەکەی مەشقوڕاهێنانەکانی کرۆتۆنیەوە کردووە.
کۆرێری جەختدەکاتەوە، کە پڕۆتۆکۆلی کارپێکراو لە ئیتاڵیا ڕێگە بە یانەیەکی کەرەنتینکراو دەدات ڕاهێنان بکات و یارییەکانی لە کات و وادەی خۆیدا ئەنجامبدات، بەڵام لە ئەگەری دەرکەوتنی حاڵەتی دیکەی توشبوون لە ڕیزەکانی کرۆتۆنی ئەگەرێکی بەهێز هەیە ڕوبەڕوبوونەوەی یوڤانتۆس بۆ کاتێکی نادیار دوابخرێت، کە بڕیارە ئەمشەو کاتژمێر 10 بەکاتی کوردستان لە ستادیۆ ئیزیۆ سکیدا ئەنجامبدرێت.
