وەزارەتی کشتوکاڵ نرخی کڕینەوەی گەنمی جوتیارانی لە دەرەوەی سایلۆ دیاریكرد

وەزارەتی کشتوکاڵ و سەرچاوەکانی ئاوی هەرێم، نرخی کڕینەوەی گەنمی جوتیارانی لە دەرەوەی پرۆسەی وەرگرتنی گەنم لە سایلۆکانی هەرێمی کوردستان، دیاریكرد.

بەگوێرەی ڕاگەیەندراوێكی وەزارەتی كشتوكاڵی هەرێم، یەک تۆن گەنمی پلەیەک بە 475 هەزار دینار، پلە دوو بە 400 هەزار دینار و پلە سێش بە 325 هەزار دینار دەکڕێتەوە.

ئاماژە بەوەشدراوە، ماوەی وەرگرتنی گەنمی جوتیاران 45 ڕۆژ دەبێت و لە 8ی حوزه‌یرانی 2021ەوە دەستپێدەکات و 22ی ته‌مموزی 2021 کۆتایی پێدێت.

ئەوەشخراوەتەڕوو، “ئەم بڕیارە یەکێکە لە هەنگاوە گرنگەکانی پرۆژەی ستراتیژی و نیشتمانیی بەبازاڕکردنی گەنمی جوتیاران لەسەرجەم پارێزگاکانی هەرێمی کوردستان، کە ڕاستەوخۆ لەلایەن بێگەرد تاڵەبانی، وەزیری کشتوکاڵ و سەرچاوەکانی ئاو، سەرپەرشتی و چاودێری دەکرێت.”