وتەبێژی حکومەتی هەرێم ڕایگەیاند، هێرشی پەکەکە بۆسەر پێشمەرگە ئیدانە دەکەن و ئەو هێرشەش بۆسەر خەڵکی هەرێمی کوردستان ئەنجامدراوە.
جوتیار عادل، وتەبێژی حکومەتی هەرێم لە ڕاگەیەندراوێکدا دەڵێت، ” حکومەتی هەرێمی کوردستان ئەم ھێرشەی پەکەکە بە توندی شەرمەزار دەکات و چیتر خەڵک و هەرێمی کوردستان رێگە نادەن ببنە قوربانی سیاسەتی هەڵەیان و ببنە ھۆکاری زیانگەیاندنی گیانی و ماددی بە ھەرێمەکەمان”.
لە ڕاگەیەندراوەکەدا هاتووە، ” لە کاتێکدا ھێرشکردنە سەر هێزی پێشمەرگە بە ھێرشکردنە سەر تەواوی خەڵکی کوردستان دەزانین، هێزی پێشمەرگەی کوردستان بەردەوامە لە پاراستنی هاووڵاتیان و بست بە بستی خاکی هەرێمی کوردستان، و بە ئەرکی خۆی دەزانێت بەرگری لێبکات”.
جوتیار عادل وتوشیەتی، ” پرسەو سەرەخۆشی خۆشمان ئاراستەی خانەوادەی ئەو شەھیدانە دەکەین و خوازیارین لە یەزدانی دلۆڤان بە بەهەشتی بەرینیان شاد بکات و هیوای زوو چاکبوونەوەش بۆ بریندارەکان دەخوازین”.
