پارێزگاری كەركوك ڕایدەگەیەنێت، فڕۆكەخانەی مەدەنیی شارەكە ئامادەیە بۆ كردنەوە و داواش لە سەرۆك وەزیرانی عێراق دەكات فەرمان بداتە دەسەڵاتدارێتی فڕۆكەوانیی مەدەنی بۆ كردنەوەی.
ڕاكان سەعید جبوری، پارێزگاری كەركوك بە وەكالەت ڕایگەیاند، پرۆژەی فڕۆكەخانەی مەدەنیی كەركوك، یەكێكە لە پرۆژە گرنگەكان و خەون و ئامانجی پێكهاتەكانی شارەكەیە.
ئاژانسی هەواڵی عێراقی لەسەر زاری جبوری وتیشی، “پرۆژەی فڕۆكەخانەكە لەئێستادا ئامادەیە بۆ وەرگرتنی ڕێگەپێدان لەلایەن دەسەڵاتدارێتی فڕۆكەوانیی مەدەنی”.
پارێزگاری كەركوك بەوەكالەت ئاماژەی بەوەشكرد، فڕۆكەخانەكە سەرجەم پێویستییەكانی لە ڕووی گۆڕەپانی نیشتنەوە و ئامێری ڕادار و چاودێری شەو و ڕوناكی و نوسنگەی فەرمانگە و دامەزراوە فیدڕاڵی و گومرگ و بنكەی تەندروستی و ئەمنی و بەرگری شارستانی و سەرجەم پێداویستییەكانی دیكەی تیایە.
ئاماژەی بەوەشكرد، كردنەوەی فڕۆكەخانەكە خزمەت بە نزیكەی چوار ملیۆن كەس دەكات، لەنێویاندا زیاتر لە ملیۆن و 600 هەزار دانیشتووی كەركوك و ناوچەكانی دەوروبەری، جگە لە پارێزگای دیالە و سەلاحەدین و موسڵ بەهۆی هەڵكەوتی پارێزگاكەوە.
جبوری ڕونیشیكردەوە، كردنەوەكەی تەنها ڕێگەپێدانی فڕۆكەوانیی مەدەنی ماوە و داواشی لە مستەفا كازمی سەرۆك وەزیرانی عێراق كرد ڕێنوێنی بداتە فڕۆكەوانی مەدەنی و كاربكات لەسەر خێراكردنی بەدەستهێنانی ڕەزامەندیی كردنەوەی فڕۆكەخانەكە.
