سەرۆكی حكومەتی هەرێم و باڵیۆزی بەریتانیا لە عێراق كۆبوونەوە و بەپێی ڕاگەیەنراوێكی كۆبوونەوەكە باڵیۆزی شانشینی یەكگرتوو پشتگیریی خۆی بۆ ڕێككەوتنامەی ئاساییكردنەوەی دۆخی شەنگال دەربڕیوە.
بەپێی ڕاگەیەنراوێكی كۆبوونەوەكە لە دیدارەکە دوایین گۆڕانکاری و پێشهاتەکانی عێراق و ناوچەکە و پەرەپێدانی پەیوەندییەکانی نێوان هەرێمی کوردستان و بەریتانیا تاووتوێکراون. جەخت لە گرنگیی سەقامگیربوونی دۆخی عێراق و چارەسەرکردنی کێشەکانی نێوان هەرێمی کوردستان و حکومەتی فیدراڵی کرا لەسەر بنەمای دەستوور.
“باڵیۆزی بەریتانیا پشتگیریی خۆی بۆ ڕێککەوتنامەی ئاساییکردنەوەی دۆخی شەنگال دەربڕی وەک بنەمایەک بۆ سەقامگیری و ئاوەدانکردنەوەی دەڤەرەکە و گەڕانەوەی ئاوارەکان بۆ شوێنەکانیان”، وەك ئەوەی لە ڕاگەیەنراوەكەدا هاتووە.
لای خۆیەوە سەرۆکی حکومەت تیشکی خستەسەر بەردەوامیی پڕۆسەی چاکسازییەکانی کابینەی نۆیەمی حکومەتی هەرێم بە ئاڕاستەی هەمەجۆرکردنی سەرچاوەکانی داهات و بەهێزکردنی ژێرخانی ئابوری.
