بە چەند هۆكارێكی جیاواز، لە ناوچەكانی شارباژێر، سەیدسادق دەربەندیخان، سەدان دۆنم پوش و پاوان سووتان، بە هۆكاری كەوتنەوەی یەكێك لە ئاگرەكانیش هاوڵاتییەك دەستگیركراوە.
بەڕێوەبەرایەتیی پۆلیسی دارستان و ژینگەی پارێزگای سلێمانی وردەكاریی ئاگرەكانی بڵاوكردووەتەوە، دەڵێت، لە گوندى چەمک و سپیار ئاگرێکى بەرفراوان كەوتۆتەوە، بەهۆی سەختیى ناوچەکە و مەترسیى تەقەمەنى، كۆنترۆڵكردنی ئاگرەكە چەند کاتژمێرێکى خایاندووە، زیانى ئاگرەکەش سووتانی سەدان دۆنم پوش و پاوان بووە، بە هۆی كەوتنەوەی ئاگرەكەشەوە جوتیارێک لە گوندەکە دەستگیرکرا.
هەروەها لە گوندى سولەمیش لە سنوری سەیدسادق، بە هۆكارێكی نادیار، ئاگرێکى بەرفراوان کەوتۆتەوە، زیانى ئاگرەکە سووتانی 200 دۆنم پوش و پاوان بووە.
لەبارەی ئاگری سێیەمیشەوە پۆلیسی دارستان و ژینگەی سلێمانی ئاشكرایكردووە، ئاگرەكە لە نزیک تونێلى دەربەندیخان كەوتۆتەوە، لەماوەیەکى کەمدا ئاگرەکە کونترۆڵكراوە و سێ دۆنم پوش و پاوان سووتاوە، هۆکارى ئاگرکەوتنەوەکەش شۆرتى کارەبا بووە.
