ھاوسەرۆکی یەکێتی ڕایدەگەیەنێت، ڕێگەنادەن لە پرۆسەی یەكگرتنەوەی هێزەكانی پێشمەرگەدا بەرژەوەندی حزبی زاڵبکرێت و دەبێت لە یەکگرتنەوەیان بنەماکانی یەکسانی، دادپەروەری و نیشتمانی ڕەچاو بکرێت.
بافڵ تاڵەبانی، ھاوسەرۆکی یەکێتیی نیشتمانیی کوردستان ئەمڕۆ دووشەممە سەردانی فەرماندەیی ھێزەکانی حەفتای کرد و لەلایەن مستەفا چاوڕەش، فەرماندەی ھێزەکانی حەفتا و ژمارەیەک فەرماندە و پلەباڵای سەربازی پێشوازی لێکرا.
بەگوێرەی ڕاگەیەندراوێكی نوسینگەكەی، لەکۆبوونەوەیەکدا بافڵ تاڵەبانی تیشکی خستەسەر دوایین پەرەسەندنە سیاسی و ئەمنییەکان و ھەڵوەستەی کرد لەسەر بارودۆخی سەربازیی ئەمدواییەی بەغداد و چۆنییەتی ڕوبەڕوبوونەوەی پاشماوەکانی تیرۆریستانی داعش و ھەوڵەکانی یەکخستنەوەی ھێزی پێشمەرگە.
لەبارەی یەکگرتنەوەی ھێزەکانی پێشمەرگە و پێشخستنی توانا سەربازییەکان و پێداچوونەوە بە پەیکەری یەکە سەربازییەکان، ھاوسەرۆکی یەكێتی جەختی لەوەکردەوە یەکێتی پاڵپشتی و ھاوکاری سەرخستنی ئەم ھەنگاوە نیشتمانییە دەکات و دەیانەوێت ھێزێک بونیادبنێنەوە، کە لەئاست گۆڕانکارییە ئەمنی و سەربازییەکان بێت، لەڕووی نەتەوەییشەوە ببنە خاوەنی ھێزێکی پڕچەکی، تۆکمە و ڕاهێنراو، کە بەرژەوەندییە گشتییەکانی خاک و وڵات بپارێزێت.
بافڵ تاڵەبانی جەخت لەوەشدەكاتەوە،” لەگەڵ ئەم ھەنگاوانەش ڕێگەنادەین لەم پرۆسە نیشتمانییەدا بەرژەوەندی حزبی زاڵبکرێت و ناھاوسەنگی دروستبکرێت، دەبێت لە یەکگرتنەوەی ھێزی پێشمەرگەی کوردستان بنەماکانی یەکسانی، دادپەروەری و نیشتمانی ڕەچاوبکرێت”.
ھەر لەکۆبوونەوەکەدا بافڵ تاڵەبانی فەرماندەی ھێزەکانی حەفتای بەرچاوڕوونکرد لە سیاسەتی نوێی ڕوبەڕوبوونەوەی تیرۆر و چەند ڕاسپاردە و بڕیارێکی دەرکرد، لەپێناو سەقامگیری زیاتری ئاسایش و ئارامی لە ھەرێم بەتایبەت ناوچە کوردستانییەکانی دەرەوەی ئیدارەی ھەرێم، کە بۆشایی ئەمنیی تێدایە و لەئێستادا لەچوارچێوەی ژووری ھاوبەشی ئۆپەراسیۆن لەگەڵ ھێزە عێراقییەکان ھەماھەنگی دەکرێت و بەرنامە و پلان بۆ ئارامی زیاتر لەو سنوورانە دادەنرێت.
هەر بەگوێرەی ڕاگەیەندراوەكە، سەبارەت بە ژیان و گوزەرانی ھێزەکانی پێشمەرگە و دواکەوتنی موچەی چەند لیوایەکی ھاوبەش، ھاوسەرۆکی یەکێتی نیگەرانی خۆی دەربڕی و وتی، “لەڕێگەی نوێنەرەکانمانەوە لە حکومەت داوامانکردووە ئەم کێشەیە بە خێرایی چارەسەربکرێت و ڕێگەنەدرێت ژیان و قوتی ھێزی پێشمەرگەی کوردستان بخرێتە ناو کێشمەکێش و ململانێکانەوە”.
لە درێژەی سەردانەکەدا بافڵ تاڵەبانی بارەگای دەزگای ھەواڵگریی پێشمەرگەی بەسەرکردەوە و لەنزیکەوە بەدواداچوونی بۆ چۆنییەتی بەڕێوەچوونی کاروبارە سەربازی و ھەواڵگرییەکان کرد.
لەبەرامبەر ماندووبوون و ڕۆڵی دەزگاکەش لەپاراستنی ئاسایش و ئارامی ھەرێمدا، سوپاس و دەستخۆشی لە جەلال شێخ ناجی، لێپرسراوی دەزگای ھەواڵگری پێشمەرگە و ئەفسەران و کارمەندانی دەزگاکە کرد، کە لەخۆبووردووانە لەئەرکدان و ھاوکار و پشتیوانی ھێزەکانی پێشمەرگە، ئاسایش، ناوخۆ و ھێزەکانی دژەتیرۆرن و وەک یەک تیم بۆ پاراستنی سەروماڵی هاوڵاتییان کاردەکەن.
