جێگری بەڕێوبەری نوسینگەی بەرژەوەندییەکانی ڕوسیا لە سوریا ڕایگەیاند، لە ئەنجامی تەقینەوەی چەند مادەیەکی کیمیای لە ئیدلیب چوار کەس کوژراون کە خەڵکی ئەروپا و ئەفریقای باشورن.
ئەلیکسەندەر گرینکویج، جێگری بەڕێوبەری نوسینگەی بەرژەوەندییەکانی ڕوسیا لە سوریا دوێنێ 15ی ئۆکتۆبەر ڕایگەیاندووە، “ئەو شوێنەی تەقینەوەکەی تێدا ڕویداوە شوێنی دروستکردنی چەکی قەدەغەکراو بووە و دوور نیە کارگەی دروستکردنی چەکی کیمیایش بوبێت”.
ئەو بەرپرسە ڕوسییە ئاشکرایکردووە، “بە ناسنامەی ئەو کەسانەی کە لە ڕوداوەکەدا کوژراون دەردەکەوێت ئەو ئەوروپی و ئەفریقیانە شارەزابوون لە دروستکردنی چەکی قەدەغەکراو بۆ چەکدارە ئۆپۆزسیۆنەکانی حکومەتی سوریا”.
ئەلیکسەندەر گرینکویج داوای کردووە کە کۆمەڵگەی نێودەوڵەتی ئاگاداری وەها هەوڵێکی ئەو چەکدارانە بێت و لەگەری دەستڕاگەیشتنی چەکدارەکان بە چەکی قەدەغەکراو کارەساتی مرۆی ڕودەدات.
