دوای کۆبوونەوەی شاندێکی وەزارەتی پێشمەرگەی حکومەتی هەرێم لەگەڵ هاوپەیماناندا، وەزارەتەکە دەڵێت لە ئایندەیەکی نزیکدا موچەی پێشمەرگە بە ئەلیکترۆنی دەکەن.
وەزارەتی پێشمەرگە لە ڕاگەیەندراوی کۆبوونەوەکەدا دەڵێت، ” بەڕێوەبەرایەتی چاکسازی و بەڕێوەبەرایەتیەکانی وەزارەتی پێشمەرگە ، لەگەڵ کۆڵۆنێڵ یان تێن هۆڤ، ڕاوێژکاریی سەربازی هۆڵەندا کۆبونەوەیەکی بەڕێوەبرد، بەمەبەستی تاوتوێکردنی پرۆژەی بە ئەلیکترۆنیکردنی مووچەی پێشمەرگە”.
ئاماژە بەوەشکراوە، “لە کۆبونەوەکەدا جەختکراوە لە دروستکردنی داتابەیسێکی ناوەندی لە وەزارەت بە هەماهەنگی ئەو لایەنانە و پاڵپشتی هێزەکانی هاوپەیمانان، بۆ ئەوەی لە ماوەیەکی نزیکدا پرۆژەکە بە ئەنجام بگات وهەنگاو بنرێت بۆ جێبەجێکردنی”.
هاوپەیمانی نێودەوڵەتی دژی داعش هاوکاری وەزارەتی پێشمەرگە دەکات بۆ یەکخستنەوە و داتابەیسکردنی وەزارەتەکە، لە کاتێکدا لیوا هاوبەشەکانی سەر بە وەزارەتەکە لەلایەن هاوپەیمانانەوە هاوکاری و پاڵپشتی تەواو دەکرێن.
