وەزارەتی دەرەوەی عێراق ڕایگەیاند، خشتەیەکیان بە هەماهەنگی ئەمریکا داڕشتووە بۆ چۆنیەتی کشانەوەی هێزەکانی ئەمریکا و دابەشبونیان لە دەرەوەی خاکی عێراق.
ئەحمەد سەحاف، وتەبێژی وەزارەتی دەرەوەی عێراق دوێنێ 15ی ئەیلول لە بەیاننامەیەکدا ڕایگەیاندووە، ” فوئاد حوسێن، وەزیری دەرەوەی عێراق، لە باڵەخانەی وەزارەتی دەرەوە سەرپەرشتی کۆبوونەوەیەکی کردووە کە راوێژکاری ئاسایشی نیشتمانیی عێراق، قاسم ئەعرەجی و نوێنەرانی لایەنە پەیوەندارەکان بە دۆسیەی ئەمنی ئامادەی بوون.
سەحاف ئاشکراشیکردووە، ” ئەو لیژنەیە دەرەنجامی گفتوگۆی ستراتیجی نێوان هەردوو حکوومەتی عێراق ئەمریکایە کە لە 19ی ئابی رابردوو لە واشنتۆن بەڕێوەچوو.
وەزارەتی دەرەوە ئاشکرایکردووە، لیژنەیەک پێکهاتووە بۆ هەماهەنگی لەگەڵ لایەنی ئەمریکی تا بتوانرێت بەشێوەیەکی ڕێک هێزەکانی ئەمریکا لە دەرەوەی عێراق دابەشبکرێن.
ئاشکراکردنی ئەم هەوڵە لە کاتێکدایە کە دوای کوژرانی قاسم سولەیمانی و مەهدی موهەندیس، پەرلەمانی عێراق بە زۆرینەی دەنگ پڕۆژە یاسای دەرکردنی هێزە بیانییەکانی لە خاکی عێراق قبوڵکرد، تا ئێستاش بەشێک لە شیعەکانی عێراق داوای کرداریکردنی ئەو بڕیارە دەکەن.
