لە ماوەی سێ ڕۆژی ڕابردوودا، گۆرانییەکی تێکەڵی منداڵێکی خەڵكی شاری بۆکان، بەشێکی زۆری هونەردۆستانی لە باشوور و ڕۆژهەڵاتی كوردستان بەخۆیەوە سەرقاڵکرد و کاردانەوەی جیاوازی لێکەوتەوە.
منداڵەکە لە “فێرگەی میوزیكی پاییزە” لە شاری بۆکان گۆرانییەکەی وتووە، یەکێک لە سەرپەرشتیارانی گروپی پاییزە لە بۆکان، بە تۆڕی میدیایی ئێستای ڕاگەیاند، “منداڵەکە ناوی ژیار قوڕەیشی-یە و ئەوە کاری یەکەمیەتی لە فێرگەکەدا، بەڵام ڕەنگە کۆتا کاری نەبێت”.
ئەو سەرپەرشتیارەی فێرگەی میوزیكی پاییزە وتیشی، “کارەکەی ژیار قوڕەیشی، پڕۆژەیەکی درێژخایەنە، بەسەرپەرشتیی مامۆستا فەرهادی مەحمودزادە و لە ئایندەدا کاری بەپێزتر دەبینن”.
فێرگەی میوزیكی پاییزە، فێرگەیەکی فرەچەشنی میوزیكییە لە شاری بۆکانی ڕۆژهەڵاتی کوردستان، فێرگەکە گرنگی بە میوزیكی فۆلکلۆر و ئێرانی و ڕۆژئاوا و هونەری منداڵان دەدات، لەلایەن چەند هونەرمەندێکی شاری بۆکانەوە سەرپەرشتی دەکرێت.
فێرگەی میوزیکی پایزە، سەرەتاییەتی و دەیەوێت لە ئایندەیەکی نزیکدا ئەگەر ڤایرۆسی کۆرۆنا ڕێگەبدات، کۆنسێرتێک سازبکەن و زیاتر خۆیان بە هونەرمەندان و هونەردۆستانی کورد بناسێنن.
