بنیامین نەتەنیاهوی سەرۆکوەزیرانی ئیسرائیل ئەمڕۆ هەینی کۆتایهێنانی بە کردە سەربازییەکانی سەر کەرتی غەززەی ڕاگەیاند، هەروەها خاپوورکردنی تواناکانی حەماسی ئاشکراکرد کە پاڵپشتی بوون بۆ هێرشەکانی بزوتنەوەکە.
لە کۆنگرەیەکی ڕۆژنامەوانی هاوبەشی بنیامین نەتەنیاهو و وەزیری بەرگریی ئیسرائیلدا دوای ڕاگەیاندنی ئاگربەست لەلایەن نەتەنیاهووە وەزیری بەرگریی ئیسرائیل ڕایگەیاند، “ئێمە دەرفەتی ئاشتییمان لەبەردەمدایە و پێویستناکات لەدەستیبدەین”.
بینی گانتس وتی، “هێرشە سەربازییەکانی سەر غەززە پێویستە ببێتە سەرەتایەک بۆ ئاشتی و ڕێگریکردن لە دووبارە بوونەوەی ئەو گرژییانە، نەگەڕانەوە بۆ بژاردەیەکی گونجاوی سیاسی بەمانای دووبارە گەڕانەوە بۆ ئەو هێرشانە دێت”.
لەلایەکی دیکەوە هەر ئەمرۆ ئیسماعیل هەنییەی سەرۆکی بزوتنەوەی حەماس ڕایگەیاند، حەماس ئەمجارە توانی سەرکەوتووبێت بەسەر ئیسرائیلدا و وتی، قودس ناوەندی ململانێکانی نێوان فەڵەستین و ئیسرائیل دەبێت.
هەروەها لە تویتێکدا هەنییە سوپاسی کۆماری ئیسلامیی ئێرانی کرد کە بە چەک و هاوکاریی دارایی پاڵپشتیی حەماسی کردووە.
