لەڕێگەی شارەوانیی سلێمانییەوە، خاوەنی مۆلیدە ئەهلییەکان ئاگادارکراونەتەوە، دەبێت لەکاتی نوێکردنەوەی مۆڵەتەکانیان، 8 نەمام بکڕن و بیدەن بە بەڕێوەبەرایەتیی باخچەکان بۆ ناشتنیان.
تاریق سەمین، سەرۆکی کۆمەڵەی مۆلیدە ئەهلییەکان، بە تۆڕی میدیایی ئێستای ڕاگەیاند، “خاوەن مۆلیدە ئەهلییەکان لە ڕابردوو و لە ئێستاشدا دەستیان هەبووە لە سەوزکردنی شاردا و ساڵانی ڕابردوو 11 هەزار نەمامیان لە سلێمانی ناشتووە و ئێستا بەرهەمەکەی دەبینین”.
وتیشی، “ئێستا فشارێکی زۆر لەسەر مۆلیدە ئەهلییەکان دروستبووە، چونکە لەلایەکەوە گازیان بۆ دابینناکرێت و لەلایەکی دیکەوە لەلایەن فەرمانگەکانی دیکەوە فشاریان لێدەکرێت و باج دەدەن، کە کۆی فشارەکان وا لە خاوەن مۆلیدەکان دەکات زیانیان پێبگات و کاریگەری لەسەر دابینکردنی کارەباکەیان هەبێت”.
بۆ ئەمساڵ شارەوانیی سلێمانی خاوەن مۆلیدە ئەهلییەکانی ناچارکردووە بە کڕینی 8 نەمام، کە نرخەکەی دەگاتە 140 هەزار دیناری عێراقی و پاش کڕینی دەدرێتە دەست بەڕێوەبەرایەتیی باخچەکان بۆ ناشتنیان.
لەناو سنوری کۆمەڵەی مۆلیدە ئەهلییەکاندا 548 مۆلیدەی ئەهلی بوونیان هەیە، کە دەبێت هەموویان نەمام بکڕن و کۆی گشتی دەكاتە نزیکەی سێ هەزار نەمام.
حکومەتی هەرێم لە ساڵی 2016 وە هیچ بڕە گازێکی بۆ مۆلیدە ئەهلییەکان دابیننەکردووە و دەبێت خۆیان گاز بکڕن، بەوتەی خۆشیان، بەراورد بە ساڵانی ڕابردوو، کاتژمێرەکانی پێدانی کارەبای مۆلیدە کەمترە، بۆیە داهاتێكی کەمتریان دەستدەکەوێت
