بافڵ تاڵەبانی، هاوسەرۆکی یەکێتیی نیشتمانیی کوردستان ئەمڕۆ شەممە بەبۆنەی ساڵیادی دامەزراندنی یەکێتیی مامۆستایانی کەردستانەوە پەیامێکی بڵاوکردەوە و ڕایگەیاند خۆیان بەبەشێک لە خەباتی مامۆستایان دەزانن و هەوڵی بێوچان دەدەن بۆ دابینکردنی ژیانێکی شایستە بۆیان.
لە پەیامەکەیدا بافڵ تاڵەبانی، پیرۆزبایی ئاڕاستەی مامۆستایانی کوردستان دەکات بەبۆنەی ساڵیادی دامەزراندنی یەکێتیی مامۆستایانی کوردستانەوە.
هاوسەرۆکی یەکێتی ڕایگەیاندووە، ” یەکێتیی نیشتمانیی کوردستان خۆی بە بەشێک لە خەباتی پیشەیی و مەدەنیی مامۆستایان دەزانێت و بەگرنگییەوە لە ڕۆڵ و کاریگەری ئەم چینە ماندونەناسە دەڕوانێت”.
دەشڵێت، ” لەلای ئێمە مامۆستا پایەبەرزەکان پێگەیەکی گرنگ و باڵایان ھەیە و ماندوبوونیان لەپێناو پەروەردەکردن و گۆشکردنی نەوەی نوێخواز و زانستخواز جێگای سوپاس و ستایشی بەردەواممانە”.
ئاماژەی بەوەکردووە، “رۆڵی مێژوویی و پڕ لە سەروەریی ئێوە لە ڕابردوودا لەیادناکەین و بەڕێزەوە یادی ئەو مامۆستا تێکۆشەرانە دەکەینەوە، کە سەرباری خزمەتکردنیان بە بواری پەروەردە، بە بیر و قەڵەمە بوێرەکەیان تاوێکی تریان بە خەبات و شۆڕشی نوێ دا”.
بافڵ تاڵەبانی لە پەیامەکەیدا ڕایگەیاندووە، “بەهۆی ئەو دۆخە نەخوازراوەی لە ساڵانی ڕابردوودا ڕوبەڕووی هەرێمی کوردستان بووەوە، مامۆستایان بە دۆخێکی سەخت و ناهەمواردا تێپەڕین، بۆیە بە ئەرکی خۆمان و کاری لەپێشینەمانی دەزانین کە هەوڵی بێوچان بدەین بۆ دابینکردنی ژیانێکی شایستە و بەدیهێنانی ماف و داخوازییەکانتان”.
