تۆمەتبارانی هێرشكردنەسەر خێزانە كوردەكە لە توركیا دەستگیركران

دیمەنێكی خێزانەكە پاش هێرشكردنەسەریان

دوای هێرشكردنەسەر خێزانێكی دانیشتووی هەولێر لە پارێزگای مێرسین لەلایەن ژمارەیەك كەسی توركەوە، میدیاكانی ئەو وڵاتە دەستگیركردنی تۆمەتبارانی ڕووداوەكە ڕادەگەیەنن.

دوای نیوەڕۆی دوێنێ، خێزانێكی كوردی باشووری كوردستان، كە خەڵكی هەولێرن و بۆ گەشت لە تورکیا بوون، کاتێک ویستویانە بچن بۆ ئەنتاڵیا، لەسەر ڕێگای سەرەكیی شارۆچكەیەكی مێرسین، لەلایەن چوار تورکەوە ڕێگەیان پێگیراوە، سوكایەتییان پێكردوون و جنێویان بە كورد داوە، دواتر خێزانە كوردەكەیان بەردباران كردووە، باوك و كوڕە 12 ساڵییەكەی برینداركراون، باوكەكە برینەكەی سەختبووە و گواستراوەتەوە بۆ نەخۆشخانە.

ئاژانسی ئانادۆڵۆ-ی توركیا ئەمڕۆ هەینی بڵاویكردەوە، هێزە ئەمنییەکان هەر سێ سەرنشینەکەی ئۆتۆمبێلەکەی دیکەیان دەستگیرکردووە.

بەڵام ئاژانسەكە دەڵێت، ئۆتۆمبێلی خێزانە كوردەكە لەگەڵ ئۆتۆمبێلی تۆمەتباراندا توشی ڕووداوی هاتوچۆ بووە و بەهۆیەوە، شەڕ لەنێوانیاندا ڕوویداوە.

لەكاتێكی پێشتری ئەمڕۆدا پارێزەرانی ئاماد بە شاندێك گەیشتنە مێرسین، بەمەبەستی بەدواداچوون بۆ ڕووداوەكە و هاوكارییكردنی خێزانە كوردەكە.

لە ڕونکردنەوەیەکدا لەسەر ئەو ڕووداوە نوسینگەی ئومێد خۆشناو، پارێزگاری هەولێر ڕایگەیاند، “دوای بڵاوبوونەوەی گرتە ڤیدیۆیەک، کە تێیدا خێزانێکی شاری هەولێر، لەلایەن چەند کەسێکەوە لە وڵاتی تورکیا و لەنێوان هەردوو شاری (مێرسین و ئەدەنا) بەشێوەیەکی زۆر نامرۆڤانە هێرشیان دەکرێتەسەر و لێیان دەدرێت، ئومێد خۆشناو، پارێزگاری هەولێر، پەیوەندی بەو خێزانە و کەسوكاریانکرد و دڵنیایکردنەوە، کە لەگەڵ لایەنە فەرمییەکان لەسەر هێڵدەبێت بۆ دەستگیرکردنی تاونباران و بەسزاگەیاندنیان”.

لە ڕوونکردنەوەکەدا هاتووە،”ئێوە کەسوکاری ئێمەن و له‌هه‌ر شوێن و جێگه‌یه‌ك بێت کردەوەی لەمجۆرە بەرامبەر بەهاوشارییانی خۆمان قبوڵناکەین و بەتوندی سەرکۆنەی دەکەین”.

سەبارەت بەو بابەتە پارێزگاری هەولێر ئەم داواکارییانەی ئاڕاستەی فەرمانگەی پەیوەندییەکانی دەرەوەی هەرێمی کوردستان و کونسوڵی گشتیی تورکیا لە هەولێر کردووە:

یەکەم/ داوا دەکەین لەزووترین کاتدا په‌ڕاوی لێکۆڵینەوە بۆ ئەم بابەتە بکرێته‌وه‌ و لەڕێگەی یاساوە هۆکاری ئەو پەلاماردان و هێرشکردنە نامرۆڤانەیە بۆ سەر ئەو خێزانە یەکلابکرێتەوە و پەلاماردەر و تاوانباران بەسزای توندی یاسایی خۆیان بگەێنن.

دووەم/ داو لەکونسڵخانەی گشتیی وڵاتی تورکیا لە هەولێر دەکەین، بەفەرمی بۆ ڕای گشتی ڕوونکردنەوە بدات و هۆکاری پەلاماردان و هێرشکردنە سەر هاوڵاتییانی ئێمە لەوڵاتەکەیان ڕوونبکاتەوە.

سێیەم/ وەک پارێزگای هەولێر، بەهەمووشێوەیەک کاری لەمجۆرە لەژێر هەر پاساوێک و بڕوبیانیویەک بێت لەلای ئێمە قەبوڵکراو نییە و کارێکی نادروستە و بەتوندترین شێوە سەرکۆنەی دەکەین، قبوڵیشمان نییە لەهیچ شوێنێک هاوشاریانی ئێمە بێڕێزیان بەرابەمبەر ئەنجامبدرێت.

بابەتی پێشتر

دوای جەژن بەغداد بەشە بودجەی هەرێم دەنێرێت

بابەتی دواتر

بومەلەرزەیەك بە گوڕی 6.6 پلە ئەندۆنیسیای هەژاند

بابەتی پەیوەندیدار
Total
1
Share