وەزارەتی پەروەردەی عێراق ڕایدەگەیەنێت، تاقیكردنەوەكان بە ئامادەبوونی خوێندكار لە هۆڵەكانی خوێندن دەبێت و هیچ نیازێك نییە بۆ گۆڕینی بۆ ئەلیكترۆنی.
حەیدەر فاروق، وتەبێژ بەناوی وەزارەتی پەروەردەی فیدراڵ ئەمڕۆ پێنجشەممە لە لێدوانێكی ڕۆژنامەنووسیدا وتی، وەزارەت بەدەم بڕیارەكانی لیژنەی باڵای نیشتمانیی تەندروستی و سەلامەتییەوە چووە دەربارەی هەڵپەساردنی دەوامی فەرمی لە خوێندنگا و زانكۆكان، بەڵام ئەنجامدانی تاقیكردنەوەكان بە ئامادەبوون دەبێت لە خوێندنگاكان، وەزارەتەكە هیچ نیازێكی نییە بۆ ئەنجامدانی تاقیكردنەوەكان بە ئەلیكترۆنی.
وتەبێژەكە ئەوەشی خستەڕوو، وەزارەت دەسەڵاتی داوەتە بەڕێوەبەرایەتییە گشتییەكانی پەروەردە لەبارەی شێوازی دەوامی مامۆستا و فەرمانبەران بەپێی پێویستییان.
پێشتر لیژنەی باڵای نیشتمانیی تەندروستی و سەلامەتی بڕیاریدا بە وەستاندنی خوێندن لەناو ناوەندەكانی خوێندن و زانكۆكان و ئەنجامدانی بەشێوەی ئەلیكترۆنی، ئەمەش بەهۆی مەترسییەكانی بڵاوبوونەوەی زیاتری ڤایرۆسی كۆرۆنا.
