لافاو هەرێمەكانی ناوەڕاستی ڤێتنام-ـی گرتووەتەوە و بە لایەنی كەمەوە 17 كەس خنكاون و 13ی تریش بێسەروشوێنبوون.
ئەمڕۆ یەكشەممە 11 تشرینی یەكەم، كەناڵی تەلەڤیزیۆنی فەرمیی ڤێتنام بڵاویكردەوە، “لە چەند ڕۆژی داهاتوودا زریانێكی خوولگەیی نوێ لە ڤێتنام دەدات” و هۆشداری دا لە دروستبوونی لافاوی تر.
بە گوێرەی ڕاپۆرتی فەرمیی حكومەتی ڤێتنام، تا ئێستا لافاو كە چەند ڕۆژێكە لەو وڵاتە دا دروستبووە، بووەتە هۆی مردنی 17 كەس و بێسەروشوێنبوونی 13 كەسی تر. 31 هەزار كەس ئاوارەبوون و زیاتر لە 33 هەزار ماڵ و خانوو ژێرئاوكەوتوون.
حكومەتی ڤێتنام دەڵێت، “كاریگەریی لافاوەكە هێندە دژوارە، ڕێگەی گەیاندنی كۆمەك بە هەزاران كەسی بڕیوە و ناتوانرێت خۆراك و دەرمان و پێداویستیی تری ژیانیان پێبگەیەندرێت.”
