لەگەڵ ئەوەی لە زۆرینەی جیهانی ئیسلامیدا ڕۆژی سێشەممە 13 ی نیسان وەک یەکەم ڕۆژی مانگی ڕەمەزان دیاریکراوە، هاوکات بەهۆی خۆپارێزییەکان دژی ڤایرۆسی کۆرۆنا نوێژی تەراویح کە یەکێکە لە سمبولەکانی مانگی ڕەمەزان لای موسڵمانان سنوردار دەکرێت.
وەزارەتی ئەوقاف و کاروباری ئاینی هەرێمی کوردستان ڕێنماییەکانی کردنەوەی دەرگای مزگەوتەکانی ڕاگەیاند و لە یەکێک لە ڕێنماییەکاندا ئاماژە بەوەکراوە کە پێویستە “نوێژی عیشا و تەراویح لە 35 خولەک زیاتر نەخایەنێت”.
بڕیارەکە تەنها هەرێمی کوردستان نییە و سەرۆکایەتیی گشتیی کاروباری مزگەوتەکانی سعودییەش ڕایگەیاندووە، ژمارەی رکاتەکانی نوێژی تەراویح بۆ پێنج رکات کەمدەکرێنەوە، لەکاتێکدا پێشتر 20 رکات بوون.
ئەم ساڵ موسڵمانانی جیهان دووەم ڕەمەزان لە سەردەمی ڤایرۆسی کۆرۆنادا تێدەپەڕێنن و ئەمساڵ بە بەراورد بە ساڵی ڕابردوو ڕێکارەکان نەمترن بۆ نوێژخوێنانی ناو مزگەوتەکان لە مانگی ڕەمەزاندا.
