نزیکترین سەرچاوەکانی هەواڵ لە یانەی یوڤانتۆسەوە بڵاویانکردووەتەوە، کە ڕوبەڕوبوونەوەی ناپۆلی دەبێتە کۆتا تاقیکردنەوە بۆ ئەندریا پێرلۆی ڕاهێنەر و لە ئەگەری دۆڕاندنیدا ڕاستەوخۆ دووردەخرێتەوە.
ڕۆژنامەی “توتۆ سپۆرت” کە نزیکترین و بەهێزترین میدیای نزیکی یانەی یوڤانتۆسە ئاشکرایکردووە، سبەیشەو یانەی یوڤانتۆس لە یاریگای خۆیدا یارییەکی دواخراوی هەفتەی سێی کالچیۆ بەرانبەر ناپۆلی ئەنجامدەدات، ئەنجامی یارییەکە کاریگەریی لەسەر بارودۆخی بیانکۆنێری و پێگەی ئەندریا پێرلۆی ڕاهێنەر دەبێت.
بەپێی سەرچاوەکە، لە ئەگەری دۆڕاندنی کریستیانۆ و هاوەڵانی بەرانبەر پارتینۆپێ ڕاستەوخۆ پێرلۆ دووردەخرێتەوە، لە ئێستاشدا ئەندریا ئانێلی سەرۆکی یانە و هاوکارانی کە پێکهاتوون لە پاڤێل نێدڤید و فابیۆ پاراتیچی دەستیان بە دانوستاندن لەگەڵ ماسیمیلیانۆ ئالێگری ڕاهێنەری پێشووی یانەکە کردووە و دەیانەوێت بەهەمان موچە و مەرجی ڕابردوو بیگەڕێننەوە.
دوای شکستی یانەی خانمە پیرەکە لە خولی یانە پاڵەوانەکان، بەڕێوبەرانی لاڤیکیا سنیۆرا بڕیاریاندا بەردەوامی بە کارەکانی پێرلۆ بدەن، بەڵام دوای یەکسانبوونیان بەرانبەر تۆرینۆ و لەدەستدانی خەونی گرتنەوەی لوتکەی کالچیۆ بۆچوونەکان گۆڕانکارییان بەسەرداهات، لە ئێستادا بیریان لەوەکردووەتەوە بەر لە خراپتربوونی دۆخەکە دەبێت سنوورێک بۆ شکستەکان دابنێن.
