دوای ئەوەی بەیانی ئەمڕۆ لە ناحیەی شۆڕشی سەر بە قەزای چەمچەماڵ كەسێك گیانی لەدەستدا و دووانی دیكە برینداربوون، پۆلیسی سلێمانی ڕایدەگەیەنێت، لەسەر ڕوداوەكە شەش تۆمەتبار دەستگیركراون.
بەیانی ئەمڕۆ دووشەممە 5ی نیسان لە ناحیەی شۆڕش-ی سەر بەقەزای چەمچەماڵ بەهۆی كێشەیەكەوە گرژی كەوتە نێوان دوو بنەماڵە و شەڕ و ئاڵۆزی دروستبوو و بەهۆیەوە دوو كەس لەهەردوو بنەماڵە برینداربوون و، هاوڵاتییەكی دوكانداریش بەسەختی برینداربوو و دواتر بەهۆی سەختی برینەکەیەوە گیانی لەدەستدا.
بەڕێوبەرایەتی پۆلیسی پارێزگای سلێمانی بڵاویكردەوە، دەستبەجێ هێزەكانی پۆلیسی سنورەكە گەیشتە شوێنی ڕوداوەكە و كەشف و هێڵكاری كرا و توانرا بەهاوكاری ئاسایشی شۆڕش شەش تۆمەتبار دەستگیربكرێت و دەستیش بگیرێت بەسەر ئەو چەكانەی كە بە تۆمەتباران بووە و ئۆتۆمبێلێكیش دەستیبەسەرداگیرا.
لەئێستادا بە بڕیاری دادوەر سەرجەم تۆمەتباران ڕاگیراون و لێكۆڵینەوە لەگەڵیان بەردەوامە، وەك ئەوەی پۆلیسی سلێمانی ئاماژەی پێداوە
پێشتر حاکم سەروەر، بەڕێوبەری ناحیەی شۆڕش بە تۆڕی میدیایی ئێستای وت، شەڕەكە لە نێوان دوو دراوسێدا دروست بووە.
