کونسوڵخانەی بەریتانیا لە هەولێر، پیرۆزبایی لە شاندی دانوستانکاری هەرێم بە سەرۆکایەتی قوباد تاڵەبانی دەکات و ڕایدەگەیەنێت، ” تێپەڕاندنی ئەم بودجەیە هەلێک دەڕەخسێنێت بۆ حکومەتی هەرێمی کوردستان بۆ ئەنجامدانی چاکسازی و دووبارە بنیادنانەوە”.
لە ڕاگەیەندراوێکدا کونسوڵخانەی بەریتانیا لە هەولێر ئاماژەی بەوەکردووە، ” پیرۆزبایی خۆمان ئاراستەی هەموو ئەوانە دەکەین کەوا ڕۆلیان هەبووە لە هەردوو حکومەتی عێراق و هەرێمی کوردستان بۆ مسۆگەرکردنی گەیشتن بە ڕێککەوتن لەسەر بودجە”.
ڕاگەیەندراوەکە بۆچونی بەریتانیای لەسەر پەسەندکردنی یاسای بودجەی ئەمساڵ ڕاگەیاندووە و دەڵێت، ” تێپەڕاندنی ئەم بودجەیە هەلێک دەڕەخسێنێت بۆ حکومەتی هەرێمی کوردستان بۆ ئەنجامدانی چاکسازی و دووبارە بنیادنانەوە لە دوای کۆڤید-19. وە ئێمە لێرەوە بەتایبەتی ستایش و دەستخۆشی لە جێگری سەرۆک وەزیران قوباد تاڵەبانی دەکەین بۆ ڕۆڵە ناوازەکەی بۆ ئەنجامدانی دانوستاندنی بودجە”.
ڕاگەیەندراوەکە ئەوەشی تێدا هاتووە، “ئەم ڕێککەوتنە دەکرێت ببێتە سەرەتایەک بۆ بەهێزکردنی پەیوەندی نێوان هەولێر و بەغداد، وە بەریتانیا بەردەوام دەبێت لە پاڵپشتیکردنی هەردوولا لەم پێناوەدا”.
