سەرۆکی ڕێکخراوی (پاک) ڕایگەیاند، لەماوەی شەش مانگی ڕابردوودا نەشتەرگەریان بۆ 100 سەگ کردووە و نەزۆکیان کردوون، ئەوەش توانیویەتی ڕێگر بێت لە زیادبوونی 800 سەگی دیکە لەناو شاردا.
د. لاڤین عەبدولوەهاب، سەرۆکی ڕێکخراوی (پاک) بە تۆڕی میدیایی ئێستای ڕاگەیاند، “سبەی چوارشەممە 31 ی ئازار، زانیاری زیاتر لەسەر شێوازی نەشتگەری و چۆنیەتی پرۆسەی نەزۆککردنی سەگەکان لە پێناو پاراستنی گیانی ئاژەڵەکان و پاراستنی شاردا دەخەینەڕوو”.
سەرۆکی ڕێکخراوی (پاک) وتی، “پڕۆژەکەی ئێمەیە ناوی (گرتن، نەزۆککردن، گەڕاندنەوە)ە و لە ماوەی شەش مانگدا نەشتەرگەرییەکان ئەنجامدراون و ئەمەش ڕۆڵی گرنگی دەبێت لە بردنەپێشەوەی دۆزی ئاژەڵانی بێلانە و بنیاتنانی کۆمەڵگەیەکی ژیاندۆست و مەدەنی و ناتوندوتیژ”.
ڕێکخراوە ئەو سەگانەی کە نەشتەرگەریان بۆ ئەنجام دەدات کۆدێک دەکاتە گوێیان و بەوەش لە ئایندەدا چاودێریکردن و سەرژمێری کردنی سەگەکان ئاسانتر دەکات.
لەماوەی ڕابردوودا بەهۆی زۆربوونی سەگ لە شاری سلێمانی بەشێک لە هاوڵاتییان و چالاکان ناڕەزایەتیان دەربڕی و پێویستی پڕۆژەی ڕاگرتنی زۆربوونی سەگەکانیان خستبووە ڕوو.
