ئێوارەی دوێنێ 8ی تشرینی یەکەم بەهۆی ڕوداوێکی هاتوچۆوە شۆفێرێکی ماتۆرسکیل بە سەختی برینداربوو، بەهۆی سەختی برینەکەیەوە شۆفێرەکە نەیدەتوانی قسەبکات و پۆلیس لە ڕێگەی هاوڵاتییانەوە کەسوکارەکەی دۆزییەوە.
بەڕێوبەرایەتیی پۆلیسی سلێمانی، سوپاسی هاوڵاتییانی کرد کە هاوکاربوون لە دۆزینەوەی کەسوکاری شۆفێرەکە و ئێستا بریندارەکە لە ژێر چاودێریی پزیشکدایە.
بەپێی ڕاگەیەنراوی پۆلیسی سلێمانی، “ئێوارەی دوێنێ لەڕوداوێكدا هاوڵاتییەك بەسەختی بریندار بوو (ماتۆرسكیلێكی پێبووە و ئۆتۆمبێلێك خۆی پیادا كێشاوە)، دوای گەیشتنی هێزەكانی پۆلیس و تیمە فریاگوزارییەكان هاوڵاتییەكە بۆ نەخۆشخانە گواسترایەوە، بەڵام بەهۆی ئەوەی ئەو هاوڵاتییە هیچ ناسنامە و پێناسێكی پێنەبوو نەناسرایەوە ، بەڕێوبەرایەتیی پۆلیسی پارێزگاری سلێمانی لە ئاگاداری نامەیەكدا داوای لە هاوڵاتییان كرد كە هەركەسێك زانیاری لەبارەی ئەو كەسەوە هەیە پۆلیسی سلێمانی لێئاگادار بكاتەوە”.
پۆلیس ئاشکرایکردووە کە بریندارەکە، هێشتا لە ژیاندا ماوە و کەسوکارەکەی گەیشتوونەتە نەخۆشخانە بۆلای.
