پارێزگاری هەولێر ڕایدەگەیەنێت، لە سێ ڕۆژی جەژنی نەورۆزدا لە سنوری شارەكەدا 92 تاوان و حەوت ڕوداوی هاتوچۆی “مەترسیدار” ڕویانداوە.
نوسینگەی پارێزگاری هەولێر ئەمڕۆ چوارشەممە 24ی ئازار ڕاگەیەنراوێكی دەربارەی كار و چالاكییەكانی ڕۆژانی جەژنی نەورۆز بڵاوكردەوە و تیایدا هاتووە، لە سێ ڕۆژی نەورۆزدا حەوت “ڕوداوی هاتوچۆی مەترسیدار” ڕویاندا کە بەهۆیانەوە چوار كەس گیانیان لەدەستداوە و 27ی دیكە برینداربوون.
سەبارەت بە تاوانەكانیش لە شارەكە دەڵێت، 92 تاوان تۆمارکراوە و لەو ژمارەیە 87 تاوانیان ئاشکراکراوە و تاوانباران دەستگیرکراون و پێنج تاوانیش لەژێر لێکۆڵینەوە دایە. ئاماژەشدەدات، هەر لەو سێ ڕۆژەی نەورۆزدا 10 حاڵەتی ئاگرکەوتنەوە و یەك حاڵەتی ڕزگارکردن لە خنکان هەبووە.
بەپێی ڕاگەیەنراوەكەی نوسینگەی پارێزگاری هەولێر لە ماوەی نێوان 16ی ئازار تاوەکو 23ی ئازار، 42 هەزار و 772 گەشتیار سەردانی پارێزگاكەیان کردووە.
