دەسەڵاتی فڕۆكەوانیی شارستانی لە ئیسرائیل و ئوردن ئەمڕۆ پێنجشەممە 8ی تشرینی یەكەم ئاشكرایانكرد، ڕێككەوتنێكیان ئیمزاكردووە بۆ بەكارهێنانی ئاسمانی هەردوو وڵاتەكە بە مەبەستی گەشتی بازرگانی.
ئەو ڕێككەوتنە كە ماوەی چەندین ساڵە ئامادەكاری بۆدەكرێت، ماوەی ئەو گەشتە ئاسمانییانە كەمدەكاتەوە كە لە نێوان ئیسرائیل و وڵاتانی كەنداو و خۆرهەڵاتی دووردا دەكرێن، بە هەمانشێوە گەشتە ئاسمانییەكانی ئوردن و كەنداو لەگەڵ ئەوروپا و هەردوو كیشوەری ئەمریكای باشوور و باكوور.
پسپۆڕانی بوارەكە پێشبینی دەكەن ئەو ڕێككەوتنەی نێوان ئوردن و ئیسرائیل “ببێتە هۆی كەمكردنەوەی نرخی گەشتە ئاسمانییەكان و بەكارهێنانی بڕێكی كەمتری سووتەمەنی بۆ فڕۆكەكان.”
هەوڵەكان بۆ رێككەوتنی نێوان ئیسرائیل و ئوردن بۆ بەكارهێنانی ئاسمانی هەردوولا بۆ گەشتی ئاسمانی، لە دوای ڕێككەوتنەكەی ئیسرائیل لەگەڵ ئیمارات و بەحرەین دا چڕكرانەوە و خێراكران، ئەوەش وایكرد دوای چەندین ساڵ لە وتووێژ و دانوستاندن، ڕێككەوتنەكە بگاتە قۆناغی ئیمزاكردن.
