دوای دابەزینێکی کاتی نرخی نەوت بەشێوەیەکی بەرچاو بەرزبوویەوە و لە ئێستادا لە بازاڕەکانی جیهان نرخی بەرمیلێک نەوتی خاو بە 67 دۆلار و 39 سەنتە.
ئاژانسی ڕۆیتەرز بڵاویکردووەتەوە ئەمڕۆ 5 ی ئازار، نرخى بەرمیلێک نەوتى خاوى ئەمریکی لە بازاڕەکانى جیهاندا بە 64 دۆلار و 44 سەنت مامەڵەى پێوە دەکرێت، بەراورد بەدوێنێ پێنجشەممەش، نرخی بەرمیلێک سێ دۆلار بەرزبووەتەوە.
بەرزبوونەوەی نرخی نەوت پەیوەستە بە کۆبوونەوە و ڕێککەوتنی ئۆپیک پڵەس کە ئەندامانی ئۆپیک و ئۆپیک پڵەس لەسەر ئەوە هاوڕابوون کە بەرهمهێنانی نەوت کەمبکەنەوە و بەپێی خواستی بازاڕ هەناردەی نەوت بەردەوامی پێبدەن.
بەهۆی بڵاوبوونەوەی ڤایرۆسی کۆرۆنا لە جیهاندا و وەستانی کارگەکان و گەشتی ئاسمانی خواست لەسەر نەوت کەمبوویەوە و خاوی برێنت گەیشتە نزیکەی 20 دۆلار و نەوتی خاوی ئەمریکیش دابەزی بۆ خوار 40 دۆلار.
