دوای ئەوەی خۆپیشاندەران داوایان كرد دەست لەكار بكێشێتەوە، پارێزگاری زیقار، نامەی دەستلەكاركێشانەوەی ئاڕاستەی سەرۆكوەزیرانی عێراق كرد.
نازم وائلی، پارێزگاری زیقار، كەمێك لەمەوبەر نامەی دەستلەكاركێشانەوەی ئاڕاستەی مستەفا كازمی، سەرۆكوەزیرانی عێراق كرد و دەڵێت، “بۆ ئەوەی خوێنی رۆڵەكانی شارەكەم نەڕژێت و دۆخەكە سەقامگیرببێت، دەستلەكاركێشانەوەی خۆم دەخەمە بەردەمتان و خوازیارم پەسەندی بكەم.”
ئەمڕۆ هەینی 26ی شوبات، خۆپیشاندان لە شاری ناسڕییەی ناوەندی پارێزگای زیقار ئەنجامدرا و خۆپیشاندەران هەڵیانكوتایە سەر بارەگای پارێزگا.
خۆپیشاندەران ڕوبەڕووی هێزە ئەمنییەكان بوونەوە و پێكدادان لەنێوانیاندا ڕویدا، دواتر خۆپیشاندەران چوونە ناو بارەگای ئەنجومەنی پارێزگای زیقار و كۆنترۆڵیانكرد و داوای لەكارلادان یاخود دەستلەكاركێشانەوەی نازم وائلی، پارێزگاری زیقاریان كرد.
