شەڕی نێوان دوو بنەماڵە لە شارۆچكەی كفری، كوژرانی سێ ئەندامی یەكێك لەو دوو بنەماڵەیەی لێكەوتەوە.
موقەدەم- عەلی قەدوری، وتەبێژی پۆلیسی گەرمیان لە لێدوانێكدا بۆ تۆڕی میدیایی ئێستا زانیاری لەبارەی ڕوداوەكەوە ئاشكراكرد و وتی، “بەهۆی شەڕی نێوان دوو بنەماڵەوە، سێ كەس لە كفری كوژراون.”
وتیشی، “شەڕەكە پەیوەندی بە كێشەی كۆمەڵایەتیی پێشتری نێوان دوو بنەماڵەكەوە هەبووە، ئەمشەو هەینی 26ی شوبات شەڕ لەنێوانیاندا سەریهەڵداوەتەوە و لایەنێكیان تەقەی كردووە و سێ كەسی لە لایەنی دووەم كوشتووە.”
ڕوونیشیكردەوە كە كوژراوەكان كوڕێك و باوكی و مامێكین لە ناو شارۆچكەی كفری-دا كوژراون و دوای تەقەكردنەكە، بكوژەكان هەڵهاتوون، “بۆیە تا ئێستا نازانرێت ئەوان برینداریان هەبێت یاخود نا.”
وتەبێژی پۆلیسی گەرمیان لە لێدوانەكەیدا بۆ تۆڕی میدیایی ئێستا وتیشی، “هێزەكانی پۆلیس لە شوێنی ڕوداوەكەن و لێكۆڵینەوە دەستیپێكردووە.”
