ئابوریناسان هۆشداری دەدەن، ڕەنگە دوای لەناوچوونی كۆرۆنا، ملیۆنان هەلی كار بۆ هەمیشە لەناوبچن.
بەهۆی بڵاوبوونەوەی پەتای كۆرۆناوە لە سەرتاسەری جیهاندا، ژمارەیەكی زۆر كار و پیشە لەسەر ئاستی جیهان بایەخیان كەمبووەتەوە.
پسپۆڕانی ئابوریی خۆرئاوا دەڵێن، “ترس هەیە لەوەی دوای نەمانی پەتاكەش، ملیۆنان هەلی كار هەڵبوەشێندرێنەوە و چەندین ملیۆن كەس بۆ هەمیشە كارەكانیان لەدەستبدەن.”
ئەوان ڕوونیدەكەنەوە كە بڵاوبوونەوەی پەتای كۆرۆنا، گۆڕانێكی گەورەی بەسەر بازاڕی كاردا هێنا و وایكرد زۆرێك لە كارگەران لە ماڵەكانیانەوە كاربكەن، یاخود پێویست نەكات بەهۆی كاركردنەوە گەشت بكەن.
ئابوریناسان ئاشكرایانكردووە، ڕەنگە چەندین كارگە و كۆمپانیا بیر لەوە بكەنەوە دوای تەواوبوونی كۆرۆنا، ژمارەی فەرمانبەر و كارگەرانیان كەمبكەنەوە و بەشێكیان لە ماڵەوە كاربكەن و بەشێكیشیان دەربكرێن و ڕۆبۆت جێگەیان بگرێتەوە.
پێشتر بیڵ گەیتس، دامەزرێنەری كۆمپانیای مایكرۆسۆفت ڕایگەیاندبوو، دوای كۆرۆنا، نیوەی گەشتەكانی كاركردن و 30%ی ڕۆژانی كاركردن لە ئۆفیسدا بۆهەمیشە لەناودەچن.
