پاش ئەوەی مێردمنداڵێكی توشبووی شێرپەنجە خەونی ئەوە بووە كە ببێت بە پۆلیس، لەلایەن بەڕێوبەرایەتیی پۆلیسی هەولێرەوە خەونەكەی بەدی هێنرا و بەرگی پۆلیسی لەبەر كرا.
ڕێكخراوی منداڵپارێزی كوردستان ڕایگەیاندووە، “منداڵێکی ژیکەڵەی تەمەن 13 ساڵ لە نەخۆشخانەی نانەکەلی/ هەولێر چارەسەری شێرپەنجە وەردەگرێت، خەون و ئاواتی ئەوەبوو ڕۆژێک ببێت بە پۆلیس”.
ئاماژە بەوەشكراوە، “ڕۆژی 24ی شوبات، منداڵپارێزی کوردستان بە هاوکاریی (بەڕێوبەرایەتیی پۆلیسی هەولێر) خەونی منداڵەکەیان بەدیهێنا و بۆ ماوەی سێ کاتژمێر بوو بە پۆلیس و لەگەڵ کارمەندەکاندا بە ئۆتۆمبێلی پۆلیس سەردانی شەقام و بازاڕی شاری هەولێری کرد”.
ڕێكخراوەكە ئەوەشی ڕایگەیاندووە، “ئاواتەخوازین هەموو ئەو منداڵانەی چارەسەری شێرپەنجە وەردەگرن هیوایان هەبێت و متمانەیان بەهێز بێت تا سەربکەون بەسەر شێرپەنجەدا”.
ڕێكخراوی منداڵپارێزی کوردستان سوپاسی بەڕێوبەرایەتیی پۆلیسی هەولێری كرد، هاوکاریان بوون لە بەدیهێنانی خەونی ئەو مێردمنداڵە.
