پێشنوێژ و وتارخوێنی شاری ئەسفەهان پێی وایە پاسکیلسواری ژنان هێندەی برسێتی، ئافات و بەڵایە و دەبێت حکومەت ئەو پرسە بە جدی وەربگرێت.
محەمەد تەقی ڕەهبەر، پێشنوێژ و وتارخوێنی شاری ئەسفەهان لە وتارەکەیدا دوێنێ 19 ی شوبات ڕایگەیاندووە، “گرانی لە وڵاتدا ڕەنگە جیاوازی لە نێوانماندا نەکات، بەڵام پاسکیلسواری ژنان کۆمەڵگە دوو لەت دەکات و فیتنەیە”.
لە وتارەکەیدا “ئیمام جومعەی ئەسفەهان وتوویەتی، “ماوەیەک پێش ئێستا بەشێک لە خوێندکارانی زانکۆ نامەیان بۆ ناردووم تا کچانی خوێندکار و ژنانی دیکە ئاگادار بکەمەوە کە بەو کارەیان ئێمە و خەڵکی دیکە ئازار نەدەن”.
بە وتەی محەمەد تەقی، “برسێتی چۆن فشاری بۆ خەڵكی هێناوە، پاسکیلسواریش وەک دەردەکەوێت فشاری بۆ پیاوان و کوڕان هێناوە”.
ماوەی 20 ساڵە پرسی ڕۆشتنی ژنان بۆ یاریگاکان و پاسکیلسواری ژنان پرسێکی گەرمی میدیا و کەسایەتییە ئاینییەکانی ئێرانە، شاری مەشهەد و ئەسفەهان بە دوو شاری دژی ئەو دوو بابەتە دادەنرێن و بەم دوایانە پرسی پاسکیلسواری ژنان قسەوباسێکی زۆری لەسەر دەکرێت.
ئەگەرچی تا ئێستاش هیچ یاسایەک نییە کە پاسکیلسواری ژنان لە ئێران قەدەغەبکات، بەڵام کەسایەتییە ئاینییەکان بەردەوام دژی ئەو حاڵەتەن و پێشتریش نوێنەری ئەسفەهان لە مەجلیسی شارەزایانی ئێران ڕایگەیاندبوو، “ئەسفەهانییەکان گیانیان دەرچووە لەبەر پاسکیلسواری ژنان و دەبێت پارێزگار خۆی یاسایەک بۆ ئەو پرسە دەربکات”.
